მატერაცი ზიდანის „რეალის“ თავკაცად დანიშვნას გამოეხმაურა
იტალიის ნაკრების ექს-ფეხბურთელმა მარკო მატერაციმ მადრიდის „რეალის“ მთავარი მწვრთნელის პოსტზე ზინედინ ზიდანის დანიშვნა შეაფასა.
„ბენიტესის გადადგომას ვწინასწარმეტყველებდი, მხოლოდ რამდენიმე დღით შევცდი. შესაძლოა, მსოფლიოს საუკეთესო მწვრთნელი იყოთ, მაგრამ ფეხბურთელებთან ურთიერთკავშირის გარეშე ვერაფერს მიაღწევთ. ვერაფერი გამოგივათ, თუ თქვენზე ძლიერ ადამიანებთან საერთო ენას ვერ იპოვით. „რეალი“ მძიმე კლუბია, აქ მხოლოდ პრეზიდენტის მხარდაჭერა არ კმარა. ბენიტესი არ იცვლება, მას ერთ და იგივე პრობლემები აქვს. იმის ნაცვლად, რომ რონალდუსთან კონტაქტი დაემყარებინა, ის ბეილს დაუახლოვდა.
მსგავს სიტუაციაში ბენიტესი „ინტერშიც“ იყო. პირველივე დღეს ის ძანეტის, კორდობასა და კამბიასოს ელაპარაკობა, თუმცა კრისტიან კივუს ყურადღებას არ აქცევდა.
„რეალს“ მხოლოდ ორი ვარიანტი ჰქონდა – ანჩელოტი ან ზიდანი. ზინედინი ძლიერი პიროვნებაა, მას მუშაობის დიდი გამოცდილება აქვს. ადვილი გასეირნება მას არ ელის. 2-3 ტურის შემდეგ ასეთი დიდი ფეხბურთელის შეფასებასაც კი დაიწყებენ. რაც არ უნდა იყოს, მას ყველაფერ საუეკთესოს ვუსურვებ“, – განაცხადა მატერაციმ.
