მათე ცინცაძემ “ტორპედო” დატოვა

ქართველმა ფეხბურთელმა მათე ცინცაძემ ქუთაისის “ტორპედო” დატოვა. ამის შესახებ 24 წლის ნახევარმცველმა საზოგადოებას სოციალური ქსელის მეშვეობით ამცნო.

“მოვიდა დრო “ტორპედოს” გულშემატკივარს დაგემშვიდობოთ, მაგრამ დამშვიდობებამდე მსურს ძალიან დიდი მადლობა გადაგიხადოთ დაუვიწყარი ერთი წლისთვის.

ამ ერთი წლის განმავლობაში იყო საქართველოს თასი, სუპერთასი, ევროპალიგის პლეი-ოფი… იყო შესანიშნავი ატმოსფერო გუნდში, რაშიც დიდი წვლილი სამწვრთნელო შტაბს მიუძღვნის. მადლობა კახა ჩხეტიანს, რომლის როლიც ამ ყველაფერში განსაკუთრებულია. მადლობა ფანებს, ვის მხარდაჭერას სულ ვგრძნობდი. და მადლობა გუნდელებს, ვისთან ერთადაც შევქმენით ის, რაც შევქმენით…

იმედი მაქვს, ერთმანეთს კიდეც შევხვდებით, იქამდე კი წარმატებებს გისურვებთ. მჯერა, “ტორპედო” ისევ ისეთი წარმატებული იქნება, როგორიც იყო! კიდევ ერთხელ მადლობა ყველარისთვის”, – დაწერა ცინცაძემ.

ქართველ ფეხბურთელს კარიერის გაგრძელება უცხოეთში სურს, თუმცა ჯერჯერობით უცნობია, თუ კონკრეტულად რომელ კლუბში გადაბარგდება ცინცაძე.

ფოტო: “ტორპედო”