“მერანი” – “ტორპედო” 0:1

17 მაისს, საქართველოს 25-ე ეროვნული ჩემპიონატის უმაღლესი ლიგის ბოლო ტურის მატჩები გაიმართა. ქუთაისის „ტორპედო“ ქობულეთში, „ჩელე არენაზე“ ნომინალურ მასპინძელს, ბოლოადგილოსან მარტვილის „მერანს“ ეწვია.

ჩემპიონატის ბოლო მატჩიდან გამომდინარე დაღლილობა ორივე გუნდს ეტყობოდა. თამაშის დაწყებიდან 7 წუთი იყო გასული, როცა ელიავას მარჯვე თამაშის წყალობით ქუთაისელებმა პენალტის შესრულების უფლება მოიპოვეს, ეს საქმე თენგიზ ჩიკვილაძემ ითავა, რომლის გამორბენის შემდეგ ანგარიში გაიხსნა – 0:1. თამაშის ყველაზე მნიშვნელოვან ეპიზოდზე უკვე ვახსენეთ, თუმცა გამორჩეულ მეორეხარისხოვან მომენტებზეც გეტყვით. მე-17 წუთზე, მარკოზაშვილის პასით ტუღუში მიუახლოვდა კარს მარცხენა მხრიდან, ბურთი მეორე ფეხზე გადაიტანა და მცველთან ჭიდილში კარშიც დაარტყა, მაგრამ მეკარემ ითამაშა უშეცდომოდ. 37-ე წუთზე, „მერანის“ აფრიკელი ლეგიონერის ძლიერი დარტყმა ვიხილეთ, ბურთს კვასხვაძე დაეუფლა პირველივე ცდაზე. პირველი ტაიმის კომპენსირებულ დროში მამასახლისი ორ ოპონენტს გასცდა და კვერნაძის გავლით ბურთი დასარტყმელ პოზიციაზე მყოფ ტუღუშს მიუვიდა, მან გაუჩერებლად დაუმიზნა კარს, მაგრამ ოდნავ ააცილა.

მეორე ტაიმში „ტორპედო“ არ რისკავდა. ტერიტორიული უპირატესობა „მერანის“ მხარეს კი იყო, მაგრამ მარტვილელთა შეტევების ლოკალიზება უმეტესად ტორპედოელთა საჯარიმოსთან ხდებოდა. 47-ე წუთზე, ბენაშვილის დარტყმით კვასხვაძე ჩაერთო თამაშში და საკმაოდ დამაჯერებლადაც. 59-ე წუთზე, ჩიკვილაძის პასით კვლავ ტუღუშს შეეძლო მეტოქის დამწუხრება, მაგრამ ამ უკანასკნელმა ათიოდე მეტრიდან მარჯვენა ფეხით ვერ დაუმიზნა კარს. 71-ე წუთზე, ჩიკვილაძემ ტრადიციულად სახიფათოდ შეასრულა სტანდარტი, ბურთი მეკარემ ნახტომში მოიგერია კუთხურზე. დარჩენილ დროში ქუთაისელთა დაცვამ ითამაშა მოწოდების სიმაღლეზე და მატჩიც მოგებამდე მას შემდეგ მიიყვანეს, რაც ბოლო წუთზე ჩუკვურანმა ვერ დაარტყა კარში თავით. მაშ ასე, ბოლო 6 მატჩიდან 5-ის მოგებით „ტორპედომ“ 25-ე ეროვნული ჩემპიონატი ქვედა ექსვეულში ერთპიროვნული ლიდერობით დაასრულა.

FCTorpedo.GE