მესი: “თუ ასე გავაგრძელებთ, “ნაპოლისთანაც” წავაგებთ”

კატალონიის “ბარსელონას” კაპიტანმა, ლიონელ მესიმ ლა ლიგის 37-ე ტურში “ნოუ კამპზე” “ოსასუნასთან” მარცხის (1:2) შემდეგ კომენტარი გააკეთა.

არგენტინელი სუპერვარსკვლავი ამბობს, რომ გუნდში ბევრი რამაა შესაცვლელი.

“არ გვინდოდა, რომ სეზონი ასე დაგვესრულებინა. ძალიან არასტაბილურები და სუსტები ვიყავით… ბევრი ქულა დავკარგეთ, “ოსასუნასთან” მარცხი კი ამ ყველაფრის შეჯამება იყო. თვითკრიტიკულები უნდა ვიყოთ. ჩვენ “ბარსელონა” ვართ და ყველაფერი უნდა მოვიგოთ. “რეალს” ვერ ვუყურებთ, ამ გუნდმა თავისი საქმე გააკეთა, ჩვენ კი მათ დავეხმარეთ.

თუ გვინდა, რომ ჩემპიონთა ლიგა მოვიგოთ, ბევრი რამ უნდა შევცვალოთ. თუ ასე გავაგრძელებთ, “ნაპოლისთანაც” წავაგებთ”, – განაცხადა მესიმ.

როგორც იცით, “რეალმა” თავისი მატჩი “ვილიარეალთან” მოიგო და ჩემპიონატის დასრულებამდე ერთი ტურით ადრე ლა ლიგის მოგება გაინაღდა.

“ბარსელონა” ჩემპიონთა ლიგის მერვედფინალურ ეტაპზე “ნაპოლის” უპირისპირდება. ამ გუნდებს შორის ნეაპოლში გამართული პირველი შეხვედრა ფრედ, 1:1 დასრულდა.