მესიმ ტოტი უკან ჩამოიტოვა

ესპანეთის პრიმერადივიზიონის 28-ე ტურში „ბარსელონამ“ „ოსასუნა“ ანგარიშით 7:0 გაანადგურა. ლიონელ მესიმ ჰეთ-თრიკი გაიფორმა და კლუბის ისტორიაში ყველა დროის საუკეთესო ბომბარდირად იქცა.

ლეო მესის აქტივში „ბარსას“ მაისურით ოფიციალურ და არაოფიციალურ მატჩებში ერთად 371 გატანილი გოლია. პრიმერადივიზიონში მესის ანგარიშზე 233 გოლი გახლავთ, რაც ერთით მეტია იტალიის სერია A-ში ფრანჩესკო ტოტის მონაგარზე. ევროპის წამყვანი ხუთი ეროვნული ჩემპიონატის შედეგებიდან მესის მაჩვენებელი სარეკორდოა.

გარდა ამისა, კატალონიური გუნდის არგენტინელი თავდამსხმელი მხოლოდ ერთი ბურთით ჩამორჩება მექსიკელ უგო სანჩესს, რომელიც თავის დროზე მადრიდის „ატლეტიკოსა“ და „რეალის“ ღირსებას იცავდა. ცნობისათვის, ესპანეთის ჩემპიონატის ყველა დროის საუკეთესო გოლეადორად ტელმო სარა („ატლეტიკი“) ითვლება, რომელსაც 252 გოლი აქვს.

ბექა დოგრაშვილი