მხითარიანი: “ძალიან გამიხარდება, თუ სომხეთის ნაკრებთან ერთად დიდ ტურნირზე ვითამაშებ”

დორტმუნდის “ბორუსიას” ნახევარმცველმა ჰენრიხ მხითარიანმა 2016 წლის ევროპის ჩემპიონატის საკვალიფიკაციო ეტაპზე სომხეთის ნაკრების შედეგი შეაფასა და იმედი გამოთქვა, რომ ეროვნულ გუნდთან ერთად ოდესმე დიდ ტურნირზე თამაშს შეძლებს.

“ჩვენი ოცნებაა ევროპის ან მსოფლიოს ჩემპიონატზე თამაში, თუმცა რას ვიზამთ… ვერ ვიტყვით, რომ ძალიან ვართ იმედგაცრუებულნი, რადგან ამ შესარჩევ ციკლში მხოლოდ ორი ქულა დავაგროვეთ. აი, ორი ან ოთხი წლის წინათ მართლაც გულდასაწყვეტი იყო, რადგან მაშინ დიდ ტურნირზე თამაშის შანსი გვქონდა.

ღმერთმა ქნას, მნიშვნელოვანი მატჩებისთვის კარგად მოვემზადოთ. მორიგი შესარჩევი ციკლის დაწყებამდე კიდევ ერთი წელია. ვფიქრობ, წარმატებისთვის ცოტა გამართლებაც საჭიროა. ძალიან გამიხარდება, თუ ნაკრებთან ერთად წარმატებას მივაღწევ”, – აღნიშნა მხითარიანმა გაზეთ “სპორტ ექსპრესისთვის” მიცემულ ინტერვიუში.