მოიესი: „ეს მხოლოდ დასაწყისია“

„მანჩესტერ იუნაიტედის“ მთავარი მწვრთნელი დევიდ მოიესი დარწმუნებულია, რომ „წითელი ეშმაკების“ თავკაცის პოსტზე მისი კანდიდატურა უალტერნატივოა.

„გუნდის გულშემატკივართა მხრიდან ყოველთვის დიდ მხარდაჭერას ვგრძნობ. ცოტა ხნის წინათ ჩემთან ქომაგები მოვიდნენ, რომლებმაც მითხრეს, რომ შექმნილი მდგომარეობა სრულად ესმით, მხარდაჭერა გამომიცხადეს და მუშაობის გაგრძელება მთხოვეს. ბოლოს და ბოლოს, ხალხმა რაც არ უნდა თქვას, ყველაზე დიდი მნიშვნელობა მაინც გუნდის შედეგს აქვს.

გავიგე, რომ გულშემატკივრებს თვითმფრინავის დაქირავება სურთ, რათა ჩემს წინააღმდეგ ბანერი ააფრიალონ. ამის მიუხედავად, კლუბთან ერთად გრძელი გზა მაქვს გასავლელი და ეს მხოლოდ დასაწყისია“, – მოიესის სიტყვები „სქაი სპორტსმა“ გამოაქვეყნა.

დღეს პრემიერლიგის 32-ე ტური გაიხსნება: „მანჩესტერ იუნაიტედი“ „ასტონ ვილას“ მიიღებს. „იუნაიტედის“ ფანებს დღევანდელი შეხვედრის მიმდინარეობსას მოიესის საწინააღმდეგო აქცია აქვთ დაგეგმილი. ქომაგებმა 840 ფუნტი შეაგროვეს და თვითმფრინავი დაიქირავეს, რომელსაც ბანერი მოაბეს – წარწერით „Wrong One – Moyes out“. თვითმფრინავი დღეს „ოლდ ტრაფორდს“ გადაუფრენს.

მატჩი თბილისის დროით 16:45 საათზე დაიწყება.

ბექა დოგრაშვილი