მორატა: “რონალდუც ადამიანია”

მადრიდის “რეალის” თავდამსხმელმა, ალვარო მორატამ თანაგუნდელ კრიშტიანო რონალდუზე ისაუბრა და თქვა, რომ ის მანქანა არ არის.

შეგახსენებთ, რომ 23 ოქტომბერს, პრიმერა დივიზიონის მე-9 ტურში “სამეფო კლუბი” საკუთარ მოედანზე ბილბაოს “ატლეტიკს” დაუპირისპირდა და მეტოქე ანგარიშით 2:1 დაამარცხა. მადრიდელთა მხრიდან გამარჯვების მომტანი გოლი 83-ე წუთზე ალვარო მორატამ გაიტანა.

შეხვედრის ბოლო წამებზე კრიშტიანო რონალდუ მეკარესთან პირისპირ გავიდა, მას მორატაც ეხმარებოდა. პორტუგალიელმა, ამ შემთხვევაში, ეპიზოდის თავად დასრულება გადაწყვიტა, თუმცა მისი დარტმული მეკარემ მოიგერია.

“როდესაც სეზონში დაახლოებით 70 გოლი გაგაქვს, რა თქმა უნდა, ეს იმას ნიშნავს, რომ გოლი შენთვის მნიშვნელოვანია. კრიშტიანო ჩვენთვის ძალიან დიდი ფიგურაა და იმედი მაქვს, რომ ის მეტოქის კარს ბევრჯერ დალაშქრავს. თუმცა, რონალდუ მანქანა არ არის, ის ადამიანია, ამიტომ მანაც, შეიძლება, საგოლე მომენტი ვერ გამოიყენოს”, – ციტირებს მორატას სიტყვებს ESPN.