მოურინიო: „ეტოო საშინაო მატჩებში საუკეთესო ფორვარდია, მაგრამ გასვლაზე…“

ინგლისის პრემიერლიგის 28-ე ტურში ლონდონის „ჩელსი“ თანაქალაქელ „ფულემს“ ესტუმრა და მეტოქე ანგარიშით 3:1 დაამარცხა. სამივე გოლი ანდრე შიურლემ გაიტანა. მოულოდნელად, „პენსიონერთა“ განაცხადში არ იყო სამუელ ეტოო. მოგვიანებით ჟოზე მოურინიომ ახსნა, თუ რატომ არ შეიყვანა კამერუნელი თავდამსხმელი განაცხადში.

„ეტოოს ყველაფერი რიგზე აქვს. უბრალოდ ვიფიქრე, რომ აგრესიული დაცვის მქონე გუნდის წინააღმდეგ ფერნანდო ტორესის თამაში უფრო გამართლებული იქნებოდა. სარეზერვო ვარიანტად კი დემბა ბა ვარჩიე.

ეტოო კი იტანს, მაგრამ მხოლოდ საშინაო მატჩებში. ის გოლებს პრემიერლიგაშიც იტანს და ჩემპიონთა ლიგაზეც, მაგრამ მხოლოდ შინ.

მას გასვლით შეხვედრებში თამაში შედარებით უჭირს. სამუელი საშინაო მატჩებში ჩვენი საუკეთესო ფორვარდია: ტექნიკა, მოძრაობა და ედენ აზართან და ოსკართან ურთიერთგაგების უნარი..

საერთო ჯამში, საშინაო მატჩებში ეტოო ჩემთვის საუკეთესოა, გასვლაზე კი მას პრობლემები აქვს“, – მოურინიოს სიტყვები „სქაი სპორტსმა“ გამოაქვეყნა.

ბექა დოგრაშვილი