მოურინიომ “მანჩესტერ სიტი” ისევ გააკრიტიკა
“მანჩესტერ იუნაიტედის” მთავარმა მწვრთნელმა, ჟოზე მოურინიომ “მანჩესტერ სიტი” გააკრიტიკა.
“იუნაიტედის” ოფიციალურ ვებ-გვერდთან ინტერვიუში პორტუგალიელმა სპეციალისტმა ფინანსურ საკითხებზე ისაუბრა და განაცხადა, რომ მისი კლუბი იმდენს ვერ დახარჯავს, რამდენსაც “მანჩესტერ სიტი”.
“თქვენი აზრით, ჩვენი კლუბი 600 მილიონს დახარჯავს იმაში, რომ ექვსი 100 მილიონად შეფასებული ფეხბურთელი იყიდოს? კლუბს ეს არ შეუძლია. მე ამას არ ველი და ამ საკითხის მიმართ კრიტიკულადაც არ ვარ განწყობილი.
“მანჩესტერ სიტის”, გვარდიოლას, მის სამწვრთნელო შტაბსა და ფეხბურთელებს ბევრი აქებს. თუმცა როცა გუნდში პეპი მივიდა, მას ინგლისის ნაკრების მეკარე ჰყავდა – არ მოეწონა, გაუშვა და მის მაგივრად “ბარსელონას” კიპერი შეიძინა. გვარდიოლას არც ის მოეწონა და ედერსონი შეიძინა, ახლა მას ის მოსწონს.
მას საბალეტა და კოლაროვი ჰყავდა – ორი ძალიან კარგი ფეხბურთელი, თუმცა ორივე ასაკოვანი. მან ისინი არა ორით, არამედ სამი მოთამაშით შეცვალა. შეიძინა “ტოტენჰემის” (უოკერი), “მონაკოსა” (მენდი) და “რეალის” (დანილო) მცველები.
შეგვიძლია, ჩვენ ერთბაშად ექვსი ან შვიდი ფეხბურთელის ყიდვა? შეგვიძლია 600-700 მილიონი ფუნტის დახარჯვა? ეს რთულია. ჩემი აზრით, ბოლო წლებში სატრანსფერო ბაზარი არასწორად იმართება, კლუბებს ლიმიტი არ აქვთ და შესაბამისად, ისინი იმას აკეთებენ, რაც სურთ”, – აცხადებს მოურინიო.
