ნიკა კაჭარავას გოლი და საგოლე პასი აელ-თან მატჩში (ვიდეო)

22 დეკემბერს, კვიპროსის ჩემპიონატში ახნას “ეთნიკოსმა” საკუთარ მოედანზე მეორე ადგილზე მყოფი აელ-ი მიიღო და ფრედ 2:2 ითამაშა.

მასპინძელთა რიგებში ორმა ქართველმა ფეხბურთელმა ითამაშა. ნიკა კაჭარავა და გია გრიგალავა ძირითად შემადგენლობაში იყვნენ, ხოლო გიორგი ილურიძე მოედანზე არ გამოჩენილა.

შეხვედრაში ანგარიში მე-18 წუთზე “ეთნიკოსის” ფეხბურთელმა ზელაიამ გახსნა, რომელსაც საგოლე პასი ნიკა კაჭარავამ გაუკეთა. ქართველმა თავდამსმელმა 32-ე წუთზე თავადაც გაიტანა. მიუხედავად იმისა, რომ მასპინძლები ორბურთიანი უპირატესობით იგებდნენ, სტუმრებმა ანგარიში მაინც გაათანბრეს და მატჩი ფრედ 2:2 დასრულდა.

“ეთნიკოსი” კვიპროსის” 14-გუნდიან ჩემპიონატში მე-9 ადგილს იკავებს. რაც შეეხება ნიკა კაჭარავას, ის 9 გოლით ჩემპიონატის ბომბარდირთა დავაში მესამე ადგილზეა.