“ნიუკასლის” ფეხბურთელები მუშტი-კრივზე გადავიდნენ, გამშველებელ შელვის ყველაზე მეტი მოხვდა
“ნიუკასლ იუნაიტედში” სიტუაცია იმდენადაა არეული, რომ გუნდის ფეხბურთელები ერთმანეთს უკვე მუშტი-კრივს უმართავენ.
“კაჭკაჭთა” ვარჯიშზე კაპიტან ჯამალ ლესელსს ნახევარმცველ მოჰამედ დიამესთვის უთქვამს, შენზე ზარმაცი ფეხბურთელი გუნდში მეორე არ მოიძებნებაო. სენეგალელს ეს შეურაცხყოფა ვერ მოუთმენია და შელაპარაკება მალე ფიზიკურ დაპირისპირებაში გადაზრდილა.
თანაგუნდელების დაშოშმინება ჯონჯო შელვიმ ითავა და როგორც ასეთ სიტუაციებში ხდება ხოლმე, გამშველებელს ყველაზე მეტი მოხვდა. ინგლისელმა ხელის თითიც მოიტეხა, მაგრამ “ნიუკასლის” მთავარმა მწვრთნელმა რაფაელ ბენიტესმა გუნდის ქომაგები დაამშვიდა, როდის იყო შელვის ასეთი ტრავმების ეშინოდა, ის მომდევნო შეხვედრებში აუცილებლად დაგვეხმარებაო.
ინციდენტი 5 ოქტომბერს მოხდა. სწორედ ამ დღეს გააფორმა ლესელსმა კლუბთან ექვსწლიანი კონტრაქტი, ბენიტესმა კი საქმისადმი პროფესიონალური დამოკიდებულების გამო გუნდის კაპიტნის მიმართ საქებარი სიტყვები არ დაიშურა.
