ოფიციალურად: დავით ხოჭოლავა “კოპენჰაგენის” ფეხბურთელია!
დავით ხოჭოლავა ამიერიდან “კოპენჰაგენის” ღირსებას დაიცავს. 28 წლის მცველმა დანიურ კლუბთან ოთხწლიანი ხელშეკრულება გააფორმა.
“ძალიან მიხარია, რომ ტრანსფერი შედგა. “კოპენჰაგენი” დიდი კლუბია შესანიშნავი ისტორიით. მათი მხრიდან ინტერესის შესახებ დიდი ხნის წინ გავიგე. ჩემით სხვა კლუბების იყვნენ დაინტერესებულნი, თუმცა “კოპენჰაგენის” არჩევა თავიდანვე მინდოდა. ვიცი, რომ კარგი თანაგუნდელები მეყოლება. ახლა მინდა, რომ მათ მალე შევხვდე და უკეთესად გავიგო გუნდის სათამაშო სტილის შესახებ”, – განაცხადა ხოჭოლავამ.
დავით ხოჭოლავა 2017 წლიდან დონეცკის “შახტარის” ღირსებას იცავდა. საერთო ჯამში, მან ამ კლუბის მაისურით 83 მატჩში მიიღო მონაწილეობა და სამი გოლი გაიტანა. მან “შახტართან ერთად ექვსი ტიტული მოიგო – უკრაინის ჩემპიონატი (2018, 2019, 2020), უკრაინის თასი (2018, 2019) და უკრაინის სუპერთასი (2017).
ქართველმა მცველმა კარიერა “საბურთალოში” დაიწყო, სხვადასხვა დროს ითამაშა რუსთავის “ოლიმპში”, ბოლნისის “სიონში”, თბილისის “დინამოში”, ფოთის “კოლხეთში”, ქობულეთის “შუქურასა” და ოდესის “ჩერნომორეცში”.
🤝✍️✔️🇬🇪 #fcklive #sldk pic.twitter.com/ec7dDd8KOM
— F.C. København (@FCKobenhavn) July 6, 2021
