ოფიციალურად: მანჩინი “გალათასარაის” ჩაიბარებს
![](https://fanebi.com/wp-content/uploads/2013/10/roberto.jpg)
იტალიელი სპეციალისტი საკუთარ სამწვრთნელო კარიერას თურქეთში გააგრძელებს.
როგორც “გალათასარაის” ოფიციალური ვებ-გვერდი იუწყება, გუნდის მთავარ მწვრთნელად რობერტო მანჩინი დაინიშნა.
“მანჩესტერ სიტის” ყოფილმა თავკაცმა თურქებთან სამწლიან კონტრაქტს მოაწერა ხელი. მისი წლიური ანაზღაურება 4.5 მილიონი ევრო იქნება. ამას გარდა, მან შესაძლოა გარკვეული ბონუსებიც მიიღოს.
იმ შემთხვევაში, თუ მანჩინის გუნდი უეფას ჩემპიონთა ლიგის 1/4 ფინალურ ეტაპს მიაღწევს, მას დამატებით 300 ათას ევროს გადაუხდიან. თუ ნახევარფინალს მიაღწევს 500 ათასს, თუ ფინალში გავა მილიონს, ხოლო თუ ჩემპიონთა თასს მოიგებს, 2.5 მილიონს. ასევე, თუ მიმდინარე სეზონში “გალა” თურქეთის ჩემპიონი გახდება, მაშინ გუნდის თავკაცი კიდევ 1.25 მილიონით გამდიდრდება.
რობერტო 300 ათასით დაჯილდოვდება, თუკი მისი გუნდი ევროპის ლიგის ფინალში გავა. უეფას სუპერ თასის მოგების შემთხვევაში, იგი 500 ათასს მიიღებს, ხოლო მსოფლიოს საკლუბო ჩემპიონატის მოგებისთვის, იტალიელს 300 ათას ევროს გადაუხდიან.
სანდრო საპანაძე