ოფიციალურად: რაფაელ ბენიტესი “ნიუკასლის” თავკაცია

ცნობილი ესპანელი სპეციალისტი რაფაელ ბენიტესი ინგლისის პრემიერლიგაში დაბრუნდა. იგი “ნიუკასლ იუნაიტედის” მთავარი მწვრთნელის პოსტზე იმუშავებს.მხარეებს შორის სამწლიანი შრომითი ხელშეკრულება გაფორმდა.

“მე ვიბარებ ლეგენდარულ ინგლისურ კლუბს, რომელსაც პრემიერლიგის მიმდინარე სეზონის დარჩენილ ნაწილში დიდი გამოწვევა აქვს.

ეს იქნება გამოწვევა არამხოლოდ ჩემთვის და ჩემი შტაბისთვის, არამედ ფეხბურთელებისთვის, კლუბისთვის და ფანებისთვის.

ყველა ჩვენგანმა ერთი მიმართულება უნდა ავიღოთ და ერთი მიზნისკენ დავირაზმოთ. სწორედ ამიტომ, მე გთხოვთ გულმხურვალე მხარდაჭერას, რათა დასახულ ამოცანას თავი გავართვათ.

პრემიერლიგაში დავბრუნდი, ახლოს ვიქნები ჩემს ოჯახთანაც. ამაზე მეტად რა გამახარებდა?!” – ბენიტესის კომენტარი კლუბის ოფიციალურ ვებგვერდზე გამოქვეყნდა.

ინგლისის პრემიერლიგის სატურნირო ცხრილში “ნიუკასლ იუნაიტედს” ბოლოსწინა ადგილი უკავია და მე-17 პოზიციამდე მხოლოდ ერთი ქულა აშორებს.