ოვერმარსს “აიაქსიდან” წასვლა ქალი კოლეგებისთვის არასასურველი მესიჯების გაგზავნის გამო მოუწია

“აიაქსის”, “ბარსელონას” და “არსენალის” გამორჩეულ ნიდერლანდელ ფეხბურთელს მარკ ოვერმარსს, რომელიც ბოლო 10 წელი “აიაქსის” სპორტული დირექტორი იყო, გუნდიდან წასვლა ქალი კოლეგებისთვის შეუსაბამო წერილების გაგზავნის გამო მოუწია.

როგორც გაირკვა, 48 წლის ოვერმარსი გარკვეული პერიოდის განმავლობაში კლუბის სტრუქტურაში მომუშავე ქალებს არასასურველ მესიჯებს უგზავნიდა, რაც ცნობილი უკანასკნელ დღეებში გახდა.

“მრცხვენია, სამწუხაროდ, მე ვერ გავაანალიზე, რომ ყველა ზღვარს გადავედი. მოულოდნელად უდიდესი ზეწოლა ვიგრძენი, ბოდიშს ვიხდი. უეჭველია, ჩემი პოსტისთვის ჩემი საქციელი მიუღებელია, მე ამას ახლა ვხვდები, მაგრამ უკვე გვიანია. სხვა გზას ვერ ვხედავ, გარდა “აიაქსის” დატოვებისა. ამას ახლა უდიდესი გავლენა ექნება ჩემს პირად სიტუაციაზე, ამიტომ ყველას ვთხოვ, მე და ჩემი ოჯახი მარტო დაგვტოვოს“, – განაცხადა ოვერმარსმა.

“აიაქსის” აღმასრულებელმა დირექტორმა ედვინ ვან დერ საარმა თანამშრომლებს უსაფრთხო გარემოში მუშაობას დაპირდა.

“ჩემი როლიდან გამომდინარე, პასუხისმგებლობას მეც ვრძნობ კოლეგების წინაშე. უსაფრთხო სპორტი და უსაფრთხო სამუშაო გარემო ძალიან მნიშვნელოვანია. ჩვენ ახლა კიდევ უფრო მეტ ყურადღებას მივაქცევთ ამას.

მე და მარკი 1990-იანი წლიდან მოყოლებული ვთამაშობდით “აიაქსში”, ნიდერლანდების ნაკრებში და შემდეგ “აიაქსის” მენეჯმენტში უკვე 10 წელზე მეტია ერთად ვართ. ეს ჩემთვის უბრალოდ გასროლილი ინფორმაციასავით იყო. ჩვენ “აიაქსში” მნიშვნელოვან და მშვენიერ რაღაცებზე ვმუშაობთ და ეს ამბავი ყველა შეძრავს, ვისაც კლუბი უყვარს”, – თქვა ედვინმა.

ოვერმარსმა ამსტერდამელებთან კონტრაქტი ცოტა ხნის წინ 2025 წლამდე გაახანგრძლივა, თუმცა გუნდი უკვე დატოვა.