კვიპროსული “აპოლონის” ქართველმა შემტევებმა, გიორგი პაპუნაშვილმა და რევაზ ინჯგიამ “აპოლონის” 15 მატჩში სულ შვიდი და 43, ჯამში 50 წუთი ითამაშეს.

პაპუნაშვილი ბოლო ტურში “ეთნიკოსთან” უნდა შესულიყო, მაგრამ “აპოლონმა” გოლი შეაგდო და მწვრთნელმა, ალექსანდრ ცორნიგერმა მისი შეყვანა გადაიფიქრა. პაპუს სულ 7 წუთი აქვს ნათამაშები, ისიც კონფერენციის ლიგაზე “ჟილინასთან”.

ინჯგია “ეთნიკოსთან” 59-ე წუთზე გამოვიდა, თუმცა მანამდე მხოლოდ 12 წუთი ჰქონდა მოედანზე გატარებული.

პაპუს აგენტის, ლევან ზუხბაიას განცხადებით, ფეხბურთელს “აპოლონის” დატოვება გადაწყვეტილი აქვს. ინჯგიას ბედი ჯერ გაურკვეველია.

“აპოლონი” 28 ქულით გათამაშების ლიდერია.

საქართველოს ნაკრების და “ულსან ჰიუნდაის” 28 წლის ფეხბურთელი ვაკო ყაზაიშვილი სამხრეთ კორეის K1 ლიგის საუკეთესო ნახევარმცველად დაასახელეს.

“მინდა დიდი მადლობა გადავუხადო გუნდის მთავარ მწვრთნელს, სამწვრთნელო შტაბს და ყველა ფეხბუთელს. ძალიან ბედნიერი ვარ ამ პრიზით და ეს ყველაფერი კიდევ უფრო მეტ მოტივაციას მაძლევს”, – განაცხადა ვაკომ ჯილდოს მიღებისას.

ყაზაიშვილმა 34 მატჩში 9 გოლი გაიტანა და 2 ასისტი გააკეთა.

ყაზაიშვილი სამხრეთ კორეის ჩემპიონატის სიმბოლურ ნაკრებშიც მოხვდა.

22 წლის ქართველმა ნახევარმცველმა ნიკა ნინუამ “ანორთოსისი” დატოვა და “პაოკში” დაბრუნდა.

ნინუა “ანორთოსისში” სექტემბერში გადავიდა, მაგრამ მხოლოდ 4 მატჩში მიიღო მონაწილეობა.

“არც ჩვენ და არც ის არის კმაყოფილი ამ სიტუაციით” – განაცხადა ქეცბაიამ 3 კვირის წინ და მას შემდეგ ფეხბურთელი განაცხადშიც ვერ ხვდებოდა.

ჯერჯერობით, ნიკა “პაოკში” დაბრუნდება და დანარჩენი უახლოეს მომავალში გადაწყდება.

“ანორთოსისში” მხოლოდ 2 ქართველი მოთამაშე – გიორგი ლორია და ნიკა კაჭარავა დარჩნენ.

30 წლის ლევან ყენიამ, რომელიც ახლა გერმანიის მე-4 ლიგელ “იურდიგენში” მთავარი მწვრთნელის ასისტენტია, “პირველი არხის” “საფეხბურთო ტაიმ-აუტში” ქართველი ფეხბურთელების პრობლემატიკაზე ისაუბრა.

“ადრინდელივით წამყვან ლიგებში მოთამაშეები აღარ გვყავს. ეს იმიტომ ხდება, რომ ქართულ ბავშვთა ფეხბურთში ძალიან დაბალი კონკურენცია და წნეხია. მხოლოდ “დინამოს”, “ლოკომოტივს” და “საბურთალოს” აქვთ აკადემიები და ეს საკმარისი არ არის, დიდი დატვირთვა არ აქვთ. გერმანიაში 17-19 წლამდელებში დიდი კონკურენცია და ყოველთვის ბოლომდე იხარჯებიან, ასე ვითარდებიან.”

“ბოლოს საბურთალოში” ვთამაშობდი და ახალგაზრდებს შევატყვე, რომ მიღწეულით მარტივად კმაყოფილდებოდნენ. ფიქრობდნენ, ადგილი გარანტირებული ჰქონდათ, ნიჭიერები იყვნენ და ნაკლის გამოსწორებაზე აღარ მუშაობდნენ. ცალკე საკითხია, რომ გუნდშიც არ გეუბნებიან, რა მინუსები გაქვს და როგორ გამოასწორო. სისტემა არ გვაქვს ფეხბურთელის აღზრდის, ამიტომ საჭიროა გვერდით ახალგაზრდა ფეხბურთელს გამოცდილი ლეგიონერი ჰყავდეს და მისგან ისწავლოს. მხოლოდ 6 თვის მაღალ დონეზე თამაში საკმარისი არ არის. საუკეთესოებში თუ საუკეთესო არ ხარ, ევროპაში ადგილს ვერ დაიმკვიდრებ. მეტი კონკურენცია და წნეხია საჭირო”

“საქართველოდან “შალკეში” რომ მოვხვდი, თავი სულ სხვა სამყაროში მეგონა., სულ სხვა მიდგომები და დატვირთვები იყო. დაახლოებით ბავშვი საბავშვო ბაღიდან რომ გამოიყვანო და ბანკში შეიყვანო ისეა. ცოტა ხანი ვქაჩავთ, მერე იწყება ტრავმები და პრობლემები”

“თუ დიდი ფეხბურთის თამაში გინდა, ქართულ მენტალიტეტს როგორ ვერ უნდა მოუარო? ყველამ საკუთარ თავს უნდა დააძალოს. ზოგიერთი ასეა – ევროპას ნახავს, ცოტა ფულს იშოვის, რამდენიმე გოლს გაიტანს, თავში აუვარდება, მცირედით დაკმაყოფილდება და მისი ამოცანა ამოწურულია. რონალდუს გოლის გატანა დღესაც ისე უხარია, როგორც პირველის. ზოგი მარტივად კმაყოფილდება, ზოგი – არა. მთავარი პრობლემა კონკურენციაა”, – განაცხადა ყენიამ.

ლევან ყენია ერთ-ერთ ყველაზე პერსპექტიულ ტალანტად ითვლებოდა, თუმცა ტრავმების გამო მისი კარიერა სათანადოდ ვერ აეწყო და 30 წლის ასაკში უკვე  მწვრთნელობას შეუდგა.

თემურ ქეცბაიას “ანორთოსისმა” ბოლო მატჩი 2-3 წააგო და 11 ტურის შემდეგ ცხრილში 13 ქულით მერვე ადგილზე აღმოჩნდა. ლიდერებთან, “აპოლონთან” და “აეკთან” ჩამორჩენა 15-14 ქულაა.

ორი კვირის წინ “ანორთოსისის” გასახდელში ბუცები და ბოთლები დაფრინავდა. თემური ყველა წაგებას და ცუდ თამაშს თავის შეგირდებს აბრალებს, როცა მათი უმრავლესობა სწორედ ქეცბაიას მოთხოვნით არიან მოყვანილნი. კაჭარავასთან შერიგება მოხდა, თუმცა “პაოკიდან” იჯარით გადმოსული ნიკა ნინუა ძალიან დიდი ხანია არ გამოჩენილა.

Sport Time-ის ცნობით, თუ რამე არ შეიცვალა და “ანორთოსისმა” მოგებები არ დაიწყო, “ანორთოსისი” ქეცბას ამდენს აღარ მოუთმენს და პრეზიდენტს რადიკალური გადაწყვეტილების მიღება მოუწევს.

ქეცბაია კლუბს სათავეში მეორედ 2019 წელს ჩაუდგა და გასულ სეზონში კვიპროსის თასის მოგება მოახერხა.

თურქული პრესის (Turkgun) ინფორმაციით, “ვალენსია” გარკვეული პერიოდის გასვლის შემდეგ კვლავ მიუბრუნდა “ტრაბზონის” მეკარე უგურჯან ჩაქირს და მზად არის მასში 17-20 მილიონი ევრო გადაიხადოს.

“ვალენსიას” პირველი შეთავაზება 5 მილიონი ევრო იჯარაში და 12 მილიონი გამოსყიდვის შემთხვევაში, “ტრაბზონმა” უარყო და ჩაქირში პირდაპირ მინიმუმ 20 მილიონ ევროს ითხოვენ.

ჩაქირი თურქეთის ეროვნული ნაკრების ძირითადი მეკარე და “ტრაბზონის” კაპიტანია და თურქეთის სუპერ ლიგის ყველაზე ძვირად ღირებული ფეხბურთელია მირალემ პიანიჩის მერე.

“ვალენსიაში” ახლა 4 მეკარე ირიცხება – სილესენი ძირითადის შეუცვლელ წევრად იქცა, მამარდაშვილმა კი ბოლოს სექტემბერში ითამაშა და თასზეც არ გამოსულა.

მაშინ როცა 2 თვის წინ გადაწყვეტილი იყო, რომ “ღამურები” ქართველის გამოსასყიდ თანხას, 800 ათას ევროს დეკემბრის ბოლოს აუცილებლად გადაიხდიდნენ, ეს საკითხი უფრო მეტად სათუო ხდება და თუ თურქი გოლკიპერი ესპანეთში წამოვიდა, შესაძლოა, მამარდა აღარ დაიტოვონ.