ქალთა ლიგის მე-11 ტურის შეხვედრაში, მოქმედი ჩემპიონი “ნიკე” და “ლანჩხუთი” ერთმანეთს უნდა შეხვედროდნენ, მაგრამ მატჩი ჩაიშალა.

ადგილობრივი გაზეთ “გურია თუდეის” ინფორმაციით, “ლანჩხუთი” თამაშის გადაღებას რამდენიმე კამერით აპირებდა, რასაც “ნიკეს” მხრიდან უკმაყოფილობა მოჰყვა და შემდგომში მოედანიც დატოვეს.

ჯერჯერობით ოფიციალური განცხადებები არ გავრცელებულა. “ლანჩხუთს”, შესაძლოა, ტექნიკური მოგება (3-0) ჩაეთვალოს.

ქუთაისის “ტორპედოს” მთავარ მწვრთნელად კახა ჩხეტიანი დაბრუნდა.

ჩხეტიანი გუნდთან კონტრაქტს 2023 წლამდე გააფორმებს და მისი ასისტენტი შოთა ბაბუნაშვილი იქნება.

ჩხეტიანი ბოლოს თბილისის “დინამოს” წვრთნიდა, თუმცა ალბანურ “ტირანასთან” მარცხის შემდეგ გუნდი დატოვა. “დინამოში” სწორედ “ტორპედოდან” გადავიდა, სადაც 4 წელი გაატარა და საქართველოში ყველა ტურნირი მოიგო. კლუბი ევროპა ლიგის პლეი-ოფშიც გაიყვანა.

კახა ბოლო 1 თვეა გუნდში არაოფიციალურად იმყოფება და ბაბუნაშვილს ეხმარებოდა.

“ტორპედოს” ფინანსური პრობლემები უკვე წლებია აქვს და როგორც ჩანს, ეს საკითხიც გვარდება.

დღეს ქუთაისელები ბათუმის “დინამოს” 19:30 წუთზე უმასპინძლებენ.