პეპ გვარდიოლა: ” მინდა ვისწავლო იმდენი, რამდენიც შესაძლებელია”
დღეს, მანჩესტერში შედგა პეპ გვარდიოლას, როგორც “მანჩესტერ სიტის” ახალი თავკაცის პრეზენტაცია. CityTv-სთან მიცემულ ინტერვიუში პეპმა აღნიშნა, რომ ის ახალი გამოწვევებისთვის მზად არის.
“ინგლისში გადმოსვლასთან და ბრიტანულ ფეხბურთში მოსვლასთან დაკავშირებით არანაირი ცუდი წინათგრძნობა არ მქონია. მინდა ვისწავლო იმდენი, რამდენიც შესაძლებელია.
რა თქმა უნდა, მაქვს გარკვეული გეგმები იმასთან დაკავშირებით, თუ როგორ უნდა ვითამაშოთ. ასევე იყო მაშინაც, როცა მიუნხენში მივედი, თუმცა მაშინ დროთა განმავლობაში ჩემი გეგმები ძირეულად შეიცვალა.
ვიცი, რამდენად ძლიერია პრემიერ ლიგა. ზოგი ამბობდა, რომ ინგლისში ჩემი ფეხბურთის თამაში გამიჭირდებოდა, ამიტომაც ჩემს თავს ვუთხარი – “რატომაც არა?” სწორედ ამიტომ ვარ აქ – იმიტომ რომ, მინდა საკუთარი თავი გამოვცადო.
უნდა მოვძებნოთ გზა, გზა გამარჯვებისაკენ და თუ მოვიგებთ ერთ მატჩს, მომდევნო კვირას ვიტყვით “კარგი, ახლა ვცადოთ და გავაკეთოთ იგივე ამ კვირასაც” – და თუ კიდევ მოვიგებთ, ვიტყვით, “გავაკეთოთ ის, რამაც ბოლო ორ მატჩში მოგება მოგვიტანა” და ასე შემდეგ.
მითხრეს, რომ ინგლისში ამის გაკეთება რთული იქნებოდა, თუმცე ჩვენ ეს “ბარსელონაში” და “ბაიერნში” გავაკეთეთ. ხალხმა შეიძლება თქვას, ‘დიახ, ეს იმიტომ რომ საქმე “ბარსელონასთან” და “ბაიერნთან” გვქონდა – ამის გაკეთება ინგლისში შეუძლებელი იქნებოდა.’ მე კი ვთქვი, კარგი, ვცადოთ.”
გვარდიოლასთან ერთად გუნდი პირველად ორშაბათს, 4 ივლისს ივარჯიშებს. პირველ მატჩში კი ინგლისური გრანდი “ბაიერნს” დაუპირისპირდება. “ალიანს არენაზე” ეს მატჩი 20 ივლისს გაიმართება.
