ფაბიო კაპელო: “რონალდუს სამი წელია მეტოქე არ მოუტყუებია”
ლეგენდარულმა იტალიელმა მწვრთნელმა, ფაბიო კაპელომ “იუვენტუსსა” და “მილანს” შორის გამართული მატჩის შემდეგ კრიშტიანო რონალდუ გააკრიტიკა.
როგორც იცით, 10 ნოემერს “იუვენტუსმა” “მილანი” 1:0 დაამარცხა. 55-ე წუთზე მაურიციო სარიმ კრიშტიანო შეცვალა და მის ნაცვლად თამაშში პაულო დიბალა ჩართო. პორტუგალიელი ფეხბურთელი შეცვლის შემდეგ პირდაპირ გასახდელში წავიდა, რაც კაპელოს არ მოსწონს.
“მე ეს არ მომწონს. ის ჩემპიონი უნდა იყოს მაშინაც კი, როცა მინდორს ტოვებს. სიმართლე ისაა, რომ რონალდუს სამი წელია მეტოქე არ მოუტყუებია. ის შინაგანად სუპერ-ჩემპიონია, მაგრამ გუნდში არიან დიბალა და დუგლას კოშტა, რომლებმაც ბოლო ორ მატჩში ბრწყინვალე გოლები გაიტანეს. დიბალა შეუდარებელ ფორმაშია, კოშტას მსგავსად.
მათ მატჩები რონალდუს გარეშე მოიგეს. ბრავო სარის, რომელსაც აქვს იმის გამბედაობა, რომ კრიშტიანო შეცვალოს. მან იცის, რომ გუნდში სხვა ბრწყინვალე ფეხბურთელები ჰყავს, ვისაც თამაშის ბედის გადაწყვეტა შეუძლია”, – უთხრა კაპელომ Sky Sport Italia-ს.
