“პირადად შეძლო კომუნიკაცია” – ლევან მაისაშვილის მდგომარეობა გაუმჯობესდა
“თბილისი მერიოტში” 15 აგვისტოს გამართულ რაგბის კავშირის ნამდვილ წევრთა რიგგარეშე საერთო კრებაზე ახალი გამგეობა დამტკიცდა.
ყრილობას 39 კლუბის (41-იდან) წარმომადგენელი დაესწრო (72 ხმა, 74-იდან) და ის რაგბის კავშირის პრეზიდენტმა იოსებ ტყემალაძემ გახსნა.
დასაწყისში მან დამსწრეებს ბორჯღალოსნების მთავარი მწვრთნელის, ლევან მაისაშვილის ჯანმრთელობის მდგომარეობის შესახებ მიაწოდა ინფორმაცია. მისი თქმით, მაისაშვილი თავს უკეთ გრძნობს და უკვე პირადად შეძლო კომუნიკაცია, უახლოეს პერიოდში კი, ექიმები მისი მდგომარეობის კიდევ უფრო გაუმჯობესებას ვარაუდობენ.
განვლილი პერიოდის ანგარიშის ფარგლებში, იოსებ ტყემალაძემ აღნიშნა, რომ რაგბის კავშირის ბიუჯეტში სახელმწიფოს წილი 17,5 მილიონი ლარიდან 27,5 მილიონ ლარამდე გაიზარდა, რის შედეგადაც გაიზარდა კლუბების დაფინანსება, როგორც დიდ 10-ში, ასევე პირველ და რეგიონალურ ლიგებში, ასევე დაიფარა რაგბის კავშირის დავალიანების ნაწილი.
შემდეგ საკითხს რაგბის კავშირის ახალი წესდების დამტკიცება წარმოადგენდა. ახალ წესდებას მხარი უმრავლესობამ დაუჭირა, ერთმა დელეგატმა თავი შეიკავა, ერთი კი წინააღმდეგი იყო.
ყოფილი გამგეობის უფლებამოსილების შეწყვეტის შემდეგ, იოსებ ტყემალაძემ დამსწრეებს ახალი გამგეობის ხუთი კანდიდატი წარუდგინა – გიორგი კობახიძე, გივი ჭიჭინაძე, აკაკი დავითულიანი, მამუკა გორგოძე და ზვიად თავართქილაძე, ასევე აჭარის რეგიონის საერთო კანდიდატი გელა ქობულაძე.
ასევე წარადგინა კლუბების მიერ დასახელებული ხუთი კანდიდატი – მერაბ ანთაძე, გიორგი ქერაშვილი, ალექსანდრე ხვედელიძე, კობა გიორგაძე და დავით კაჭარავა.
11-ივე კანდიდატს საერთო კრებაზე გამოცხადებულმა დელეგატებმა ნდობა ერთხმად გამოუცხადეს.
Rugby.ge
