პიტერ კრაუჩს გინესის რეკორდების წიგნში შეიყვანენ

“სტოკ სიტის” თავდამსხმელი, პიტერ კრაუჩი 2018 წლის გინესის რეკორდების წიგნში შევა იმ ადამიანის სტატუსით, რომელსაც ყველაზე მეტი თავური გოლი აქვს ინგლისის პრემიერ ლიგაში გატანილი.

როგორც იცით, კრაუჩს არაერთ ინგლისურ კლუბში აქვს ნათამაშები (“ასტონ ვილა”, “საუთჰემპტონი,” “ლივერპული”, “პორსმუტი”, ტოტენჰემი და “სტოკი”), ამ დროის მანძილზე კი მან 51-ჯერ შეძლო მეტოქეთა კარის თავური დარტყმით დალაშქვრა.

36 წლის პიტერ კრაუჩმა ალან შირერის რეკორდი (46 თავური გოლი) 2015 წლის მაისში დაამხო და მას შემდეგ ნელი ნაბიჯებით აუმჯობესებდა ამ ბრწყინვალე მიღწევას.

“დიდებული გრძნობაა! დიდებულია, როდესაც პრემიერ ლიგაში საკუთარი რეკორდი გაქვს, ამით ძალიან ვამაყობ,” – აცხადებს კრაუჩი, რომელსაც ინგლისის უმაღლეს ჩემპიონატში 436 მატჩი აქვს ჩატარებული.