პოჩეტინო: “ის ჩვენი მომავლის ლიდერია”
ლონდონის “ტოტენჰემის” ფეხბურთელი, დელე ალი საოცარ ფორმაშია. 20 წლის სპორტსმენმა პრემიერ ლიგის 23 შეხვედრაში 11 გოლს მოუყარა თავი. იგი გუნდის შეტევების სულისჩამდგმელია და ბოლო – დამაგვირგვინებელ ფაზაშიც შესანიშნავია.
“სპურსების” დამრიგებელმა, მაურისიო პოჩეტინომ ახალგაზრდა სპორტსმენზე ისაუბრა.
“გუნდის კაპიტანი უგო ლორისია. ის ჩვენთვის მნიშვნელოვანი ფიგურაა. ფრანგი ძალიან გამოცდილია და შეუძლია, ახალგაზრდებს საჭირო რჩევები მისცეს.”
“რაც შეეხება დელე ალის, ის გუნდის მომავლის ლიდერია. ჩემი აზრით, მას აქვს ის პიროვნული თვისებები და ხასიათი, რომელიც “ტოტეჰემის” ლიდერად გახდომაში დაეხმარება. ჩემს ყველა ფეხბურთელს გააჩნია წინამძღოლის რაღაც თვისება, უბრალოდ მათ დრო უნდათ, რომ ისინი განავითარონ.”
“მნიშვნელოვანია, გქონდეს გამარჯვებულის მენტალიტეტი და, მუდმივი შრომით, მიზნად მოგებას ისახავდე. არ კმარა, უბრალოდ თქვა – “მე მინდა გამარჯვება”. ამისთვის მუშაობა, მონდომება, ენთუზიაზმი და შეუპოვრობაა საჭირო,” – აცხადებს არგენტინელი მწვრთნელი.
