პოჩეტინო: “ტოტენჰემისთვის” პრემიერ ლიგა დასრულებულია”

პრემიერ ლიგის 27-ე ტურის მატჩში “ბარნლისთან” განცდილი მოულოდნელი მარცხის შემდეგ, ლონდონის “ტოტენჰემის” მთავარმა მწვრთნელმა პრესასთან საუბრისას აღნიშნა, რომ მისმა გუნდმა ჩემპიონობის ყველა შანსი დაკარგა.

“დიახ, ჩვენთვის პრემიერ ლიგა დასრულებულია. ძალიან იმედგაცრუებულები ვართ, რადგანაც წინ მხოლოდ 11 მატჩი გვაქვს, სხვაობა კი დიდი ალბათობით, გაიზრდება.

მართალია, დასრულებამდე ჯერ კიდევ საკმაო მატჩია დარჩენილი, თუმცა ჩემი გადმოსახედიდან მათთვის კონკურენციის გასაწევად ეს თამაში აუცილებლად უნდა მოგვეგო.

ყოველი ჩვენი შეცდომა მხოლოდ ჩვენი ბრალია და სხვას ვერავის დავაბრალებთ, რადგანაც სწორედ ჩვენ დავთმეთ,” – აცხადებს არგენტინელი სპეციალისტი.

ამ დროისთვის “სპურსი” პრემიერ ლიგის სატურნირო ცხრილში მესამე პოზიციას იკავებს 60 ქულით და 5-5 ქულით ჩამორჩება “მანჩესტერ სიტისა” და “ლივერპულს”. თუმცა “მერსესაიდელებს” ერთი მატჩით ნაკლები აქვთ ჩატარებული.