პოგბა მოურინიოს მადლობას უხდის

“მანჩესტერ იუნაიტედის” ნახევარმცველმა, პოლ პოგბამ “კარდიფთან” გამარჯვების შემდეგ გუნდის ყოფილ მწვრთნელს, ჟოზე მოურინიოს მადლობა გადაუხადა.

როგორც იცით, რამდენიმე დღის წინ მოურინიო “იუნაიტედიდან” გაათავისუფლეს. მას პოგბასთან დაძაბული ურთიერთობა ჰქონდა. მანჩესტერელებმა ახალი მწვრთნელის, ოლე გუნარ სოლსკიაერის ხელმძღვანელობით პირველივე მატჩში “კარდიფთან” 5:1 იმარჯვეს. პოგბამ ამ შეხვედრაში ორი საგოლე პასი მიითვალა.

“ვიცი, რომ ჩემგან ჟოზეს შესახებ კომენტარს ელით. პირველ რიგში, “კარდიფთან” გამარჯვებით გახარებულები ვართ, კარგად ვითამაშეთ. რაც შეეხება მოურინიოს, ჩვენ მასთან ერთად ტიტულები მოვიგეთ, რისთვისაც მადლობას ვუხდი. ტიტულის მოგება როგორც პიროვნებას და როგორც მოთამაშეს, უფრო დახვეწილს გხდის”, – უთხრა პოგბამ ჟურნალისტებს მატჩის დასრულების შემდეგ.