პრიმერა დივიზიონის პრევიუ
ესპანური პრიმერას მორიგ ტურში ლიდერებს საკმაოდ საინტერესო მატჩები ელით. ტრადიციულად გთავაზობთ მორიგი ტურის პრევიუს.
რეალი – ელჩე
შესანიშნავ ფორმაში მყოფი მადრიდის “რეალი” საკუთარ მოედანზე ერთ-ერთ აუტსაიდერ ელჩეს მიიღებს და სავარაუდოდ იოლადაც გაუმკლავდება.
სავარაუდოდ მადრიდელები მოედანზე გადახალისებული შემადგენლობით გავლენ. ანჩელოტის გუნდს რამოდენიმე დღეში ჩემპიონთა ლიგის მატჩი ელის. “ელჩსთან” კი უახლოესი რეზერვი იქნება დატვირთული. ფეხბურთის იტალიელმა სპეციალისტმა უკვე დააანონსა, რომ სერხიო რამოსს დასვენების საშუალებას მისცემს, მის ნაცვლად კი სავარაუდოდ ძირითადში ვარანის გამოჩენას უნდა ველოდოთ. აღსანიშნავია, რომ კრიშტიანო რონალდუ თანაგუნდელებს ვერც ამ მატჩში დაეხმარება. პორტუგალიელს მოედანზე გასვლის უფლება პრიმერას შემდეგ ტურში ექნება.
ოსასუნა – ატლეტიკო
მილანში მოპოვებული მნიშნველოვანი გამარჯვების შემდეგ დიეგო სიმეონეს გუნდი პამპლონას ეწვევა, სადაც ადგილობრივ “ოსასუნას” დაუპირისპირდება.
გათამაშების ცხრილის ქვედა ნაწილში მყოფ გუნდს ლიდერებთან ბრძოლა ნამდვილად ეხერხება. “ოსასუნამ” პრიმერას მიმდინარე გათამაშებაში საკუთარ მოედანზე ქულები “რეალს” და “ბარსელონას” დააკარგვინა. ახლა კი, “ესტადიო ელ სადარზე” “მილანთან” მძიმე ბრძოლის შემდეგ “ატლეტიკო” ჩადის. ფაქტია, რომ სიმეონეს ბიჭებს იოლი მატჩი არ ექნებათ. თანაც, “ოსასუნა” ბოლო შეხვედრებში საკმაოდ ნორმალურად გამოიყურება. უკანასკნელ ორ ტურში ხავი გარსიას შეგირდებმა 4 ქულა მოიპოვეს.
სოსიედადი – ბარსელონა
25-ე ტურის ერთ-ერთ ყველაზე საინტერესო დაპირისპირებას სან-სებასტიანი უმასპინძლებს, სადაც “რეალ სოსიედადთან” სტუმრად “ბარსელონა” ჩავა.
ჩემპიონთა ლიგაში მოპოვებული შთამბეჭდავი გამარჯვების შემდეგ, რომლის შედეგადაც “ბარსა” 1/4 ფინალს მიუახლოვდა მარტინოს შეგირდები პრიმერაში ლიდერობის შენარჩუნებასაც შეეცდებიან. თუმცა, ისიც აღსანიშნავია, რომ ლიდერებიდან ყველაზე რთული მეტოქე სწორედ კატალონიელებს შეხვედათ.
ევროსაგზურებისთვის მებრძოლი “სოსიედადი” იოლად არაფრის დათმობას არ აპირებს.
22/02/14
ვალიადოლიდი – ლევანტე
რეალი – ელჩე
სელტა – ხეტაფე
სოსიედადი – ბარსელონა
23/02/14
ალმერია – მალაგა
რაიო ვალეკანო – სევილია
ბეტისი – ბილბაო
ვალენსია – გრანადა
24/02/14
ოსასუნა – ატლეტიკო
25/02/14
ესპანიოლი – ვილიარეალი
