ქალთა საფეხბურთო კლუბი “მართვე” ნეკა დოროყაშვილს სოლიდარობას უცხადებს

ქალთა საფეხბურთო კლუბმა “მართვემ” ნიკოლოზ ბასილაშვილის ყოფილ მეუღლეს, ნეკა დოროყაშვილს სოლიდარობა გამოუცხადა. განცხადება კლუბის ფეისბუქ გვერდზე გამოქვეყნდა.

“ქსკ მართვეს ფეხბურთელებს გვსურს სოლიდარობა გამოვუცხადოთ ნეკა დოროყაშვილს და დავგმოთ ძალადობა. მიუხედავად იმისა, რომ სასამართლომ დაადგინა ოჯახში ძალადობის ფაქტი და ამის შემდეგ დატოვა ძალაში შემაკავებელი ორდერები, მედიით მაინც ხდება მოძალადის რეპუტაციის აღდგენა მისი ჩემპიონატში გამარჯვების გამო. ვთვლით, რომ არანაირი გამარჯვება და ტიტული არ შეიძლება გახდეს ძალადობის გადაფარვის და მოძალადის გამართლების საფუძველი. ჩვენთვის არსებითად მნიშვნელოვანია სპორტი დაცლილი იყოს ძალადობისგან და არსებობდეს მაღალი მგრძნობელობა ამ საკითხთან მიმართებაში.

სოლიდარობა ყველა ქალს, ვინც საკუთარ თავზე გამოსცადა უსამართლობა!”, – ვკითხულობთ განცხადებაში