რა უნდა ისწავლოს როჯერსმა ლიგის თასიდან გამოვარდნის შემდეგ?
“ლივერპულმა” პრემიერლიგის წლევანდელი სეზონი კარგად დაიწყო, პირველი სამი მატჩი მოიგო და ბევრი “წითლების” საჩემპიონო ამბიციებზე ალაპარაკდა. თუმცა ამ ყველაფერს “სოუნსისთან” ფრე, “საუთჰემპტონთან” სენსაციური საშინაო მარცხი და გუშინ “მანჩესტერ იუნაიტედის” გადახალისებულ შემადგენლობასთან 0-1 წაგებული შეხვედრა მოჰყვა, რამაც ბრენდან როჯერსის გუნდი ინგლისის ლიგის თასს მიღმა დატოვა.
მოდით ჩამოვთვალოთ ის ძირითადი ასპექტები, რომლებზეც წესით როჯერსმა ამ შეხვედრის შემდეგ უნდა გაამახვილოს ყურადღება:
აქცენტი პრემიერლიგაზე
“ლივერპული” ევროპულ სარბიელზე არ ასპარეზობს, ახლა უკვე “ლიგის თასსაც” გამოეთიშა, “ასოციაციის თასი” “ნომერ პირველი ამოცანა” არც არასდროს ყოფილა, შესაბამისად, “წითლების” მთავარი მიზანი ყველაფრის ისე დაგეგმვაა, რომ გუნდმა პრემიერლიგაში რაც შეიძლება ნაკლები ქულა დაკარგოს.
სტარიჯის ჯანმრთელობა
სტარიჯს ამ სეზონში უკვე ორი ტრავმა ჰქონდა. ბოლომდე ჯანმრთელი ის არც ახლაა. ცხადია, რომ მას დასვენება სჭირდება, თუმცა ეს არცთუ იოლი გადასაწყვეტია, სტარიჯი ხომ გუნდის საუკეთესო ბომბარდირია. მთავარ მწვრთნელს ამაზე ფიქრიც მოუწევს…
გოლების ნაკლებობა
ერთი თვის წინ როჯერსმა აღნიშნა, რომ მისი სურვილია “ლივერპულმა” იმაზე მინიმუმ 20 გოლით მეტი გაიტანოს, ვიდრე ეს გასულ სეზონში მოახერხა. ფაქტია, რომ ყველაფერი აქეთ ჯერჯერობით აშკარად არ მიდის. მეტიც, სტარიჯის და მოზესის გარდა, “წითლების” რიგებში გატანილი გოლით ჯერ თავი არც არავის გამოუჩენია, ესეც მორიგი თავისტკივილი…
ლუის სუარესი
საუკეთესო მოთამაშის მწყობრში ჩადგომა ბევრს არაფერს ნიშნავს, თუ არ იცი, როგორ გამოიყენო ის ეფექტურად. გუშინ როჯერსმა 3-5-2 (და მისი ვარიაცია 3-4-1-2) გამოიყენა, იმისათვის, რათა ენახა როგორ ურთიერთქმედებდნენ სუარესი და სტარიჯი, შედეგი აშკარად იმედისმომცემია, მიუხედავად იმისა, რომ წლევანდელ სეზონში მათ მოედანზე პირველი წუთები გაატარეს, საკმაოდ კარგად ცვლიდნენ ბურთსაც და პოზიციებსაც.
მიუხედავად ამისა, როჯერსს მოუწევს იფიქროს იმაზეც, როგორც შეურჩიოს ურუგვაელ ფორვარდს ისეთი პოზიცია, რომ მას მეტი გოლის გატანის შესაძლებლობა მიეცეს. თუ გასული სეზონის გამოცდილებას ენდობა, უნდა იცოდეს, რომ სუარესს შეუძლია “ლივერპული” “მასთან ერთად” და “მის გარეშე” ორი რადიკალურად განსხვავებული გუნდი გახადოს.
რა ხდება მეორე ტაიმში?
და მაინც, რა ემართება წელს ლივერპულს “მეორე ტაიმებში?” ყველა მატჩში, მათ შორის გუშინაც, ოლდ ტრაფორდზე, “წითლები” საწყის 45 წუთში დომინირებენ, შესვენების შემდეგ კი ტემპს აგდებენ და მატჩი ან ინერციით მიჰყავთ სასურველ შედეგამდე, ან მარცხდებიან…
ამ სეზონში “ლივერპულს” პრემიერლიგაში მეორე ტაიმში გოლი არ გაუტანია, რაც “სუონსისთან” ქულების დაკარგვად, “საუთჰემპტონთან” და “იუნაიტედთან” კი დამარცხებად დაუჯდა.
დაცვის იდეალური ოთხეული
დანიელ აგერის და გლენ ჯონსონის ტრავმებმა როჯერსს ბევრი საფიქრალი გაუჩინა. სად ათამაშოს კოლო ტურე, დაცვის ცენტრში თუ მარჯვენა ფლანგზე? იქნებ ჯობს, ტურეს ცენტრში მარტინ შკრტელი შეუწყვილოს? ან იქნებ უკეთესია საჰოს და მარტინ კელის მეტი სათამაშო დრო მიეცეს? შეკითხვები მართლაც ძალიან ბევრია, რომლებზეც პასუხი რაც შეიძლება სწრაფადაა გასაცემი.
დაბოლოს, კითხვა თქვენ, როგორ აფასებთ “ლივერპულის” წლევანდელ პრემიერლიგურ შანსებს?
