რატომ უყვარს ადებაიორს მოურინიო და სძულს არსენ ვენგერი?
ბრიტანული პრესა ემანუელ ადებაიორის საკმაოდ გულწრფელ ინტერვიუს აქვეყნებს, სადაც “არსენალის” ყოფილი ფეხბურთელი ხმაურიან განცხადებებს აკეთებს. ტოგოელ ფეხბურთელს “მანჩესტერ სიტის”, “ტოტენჰემისა” და “რეალის” რიგებშიც აქვს ნათამაშები.
“მოურინიო ერთ-ერთი ყველაზე გულწრფელი მწვრთნელია, რომელსაც ოდესმე შევხვედრივარ. ის მიყვარდა და ახლაც ძალიან მიყვარს. მისნაირი ადამიანი ფეხბურთში ძალიან ცოტაა, მწვრთნელების უმეტესობა ყალბია.
მაგალითად, როდესაც არსენ ვენგერმა თავის ოფისში დამიბარა, მითხრა, რომ კლუბიდან უნდა წავსულიყავი, რადგან იქ ჩემი ადგილი არ იყო. ვუთხარი, რომ დარჩენა და ბრძოლა მინდოდა, მაგრამ მან ამაზეც უარყოფითი პასუხი გამცა და მითხრა, რომ სათადარიგოთა სკამზე მომიწევდა ჯდომა.
იძულებული ვიყავი, “მანჩესტერ სიტიში” გადავსულიყავი და მიხაროდა კიდეც ეს. თუმცა, შემდეგ, პრესკონფერენციაზე ვენგერმა განაცხადა, რომ იქ ფულის გამო წავედი. სწორედ მაშინ ვიგრძენი პირველად სიძულვილი “არსენალის” მიმართ,” – აცხადებს ადებაიორი.
