რევაზ ძოძუაშვილი: „უკვე ყველაფერი კალაპოტში ჩადგა“
ქუთაისის „ტორპედოში“ შექმნილი ვითარება ბოლო დღეებია ძალზე აქტუალური არის. ახალი ჩემპიონატის დაწყებამდე ცოტა ხნით ადრე გუნდში გარკვეული სახის პრობლემები კვლავაც რჩებოდა, თუმცა ყველაზე მნიშვნელოვანი, დაფინანსების საკითხი დღეისთვის უკვე მოგვარებულია და მას ისევ კომპანია „ვისოლი“ ითავებს. სწორედ ამ თემასთან დაკავშირებით, ვფიქრობთ, თქვენთვის საინტერესო უნდა იყოს „ტორპედოს“ მთავარი მწვრთნელის მოსაზრება.
რევაზ ძოძუაშვილი: „საბედნიეროდ, „ტორპედოს“ ისევ კომპანია „ვისოლი“ დაასპონსორებს და უკვე დაფინანსების მხრივ ყველაფერი კალაპოტში ჩადგა. ფინანსური კრიზისი წარსულს ჩაბარდა და ახალი ჩემპიონატის სტარტს მშვიდად ვხვდებით. შემიძლია გითრათ, რომ ჩვენ იმაზე უფრო უკეთესი პირობები გვექნება, რაც წინა სეზონში გაგვაჩნდა. ამასთან ერთად, შემადგენლობაც გავაძლიერეთ და შესაბამისად, მიზნებიც გაიზარდა. ბუნებრივია, უკეთესის სურვილი ყოველთვისაა, მაგრამ ფეხბურთელები ამჯერად უკმაყოფილონი არ არიან. ასე რომ, უმაღლესი ლიგის გუნდისთვის შესაფერისი დაფინანსება ნამდვილად გვექნება.
მინდა ჩვენს ქუთაისელ გულშემატკივრებს, იმ ბიჭებს, რომლებიც ბოლო პერიოდში გვერდში გვედგნენ, დიდი მადლობა გადავუხადო ჩვენი მდგომარეობის სასიკეთოდ შეცვლაში შეტანილი წვლილისთვის. ჩვენ ორმაგად გვაქვს ვალი მოსახდელი მათსა და ქალაქის წინაშე.
ახალი იმედებით ველოდებით 16-გუნდიან ჩემპიონატს. ვფიქრობ, გენიალური ფორმატი იქნება. ვუსურვებ ქართული სპორტის ყველა მუშაკსა და გულშემატკივარს, რომ ეს ჩემპიონატი ყოფილიყოს ისეთი წარმატებული და მაღალი დონის თამაშებით დახუნძლული, როგორიც აქამდე არასდროს ყოფილა“.
FCTorpedo.GE
