რიბერის აგენტი: “რუსულ კლუბთან მოლაპარაკებები წარმატებით მიმდინარეობს”

საფრანგეთის საფეხბურთო ნაკრების ყოფილი წევრის, ფრენკ რიბერის, აგენტი ჟან-პიერ ბერნე ადასტურებს ინფორმაციას, რომლის თანახმადაც “ბაიერნის” ყოფილი ფეხბურთელი ახლოსაა კარიერის რუსეთში გაგრძელებასთან.

“ამ ეტაპზე რუსულ კლუბთან (“ლოკომოტივი”) მოლაპარაკებები წარმატებით მიმდინარეობს და აქტიურ ფაზაში გადადის. ყველაფერი თვის ბოლომდე უნდა გადაწყდეს,” – ვკითხულობთ ბერნეს კომენტარს რუსულ ჟურნალ-გაზეთებში.

აქამდე ვრცელდებოდა ინფორმაცია, რომ რიბერის ტრანსფერით “სპარტაკი” და “დინამოც” ინტერესდებოდნენ. რიბერი კი ახალი კლუბისგან ხელფასის სახით 8 მილიონ ევროს ითხოვს წელიწადში.

შეგახსენებთ, რომ მოსკოვის “ლოკომოტივის” რიგებში ასპარეზობს საქართველოს ნაკრების ყველაზე ძვირდღირებული ფეხბურთელი სოლომონ კვირკველია.