რობერტო ფირმინო: “ახალ პოზიციას სრულფასოვნად დავეუფლე”
მერსესაიდის “ლივერპულის” ერთ-ერთი ლიდერი, რობერტო ფირმინო თვლის, რომ თავდამსხმელის პოზიციას უკვე შეეგუა. ამის თქმის საშუალებას მას “ლივერპულის” მაისურით ჩატარებულ 31 მატჩში გატანილი 17 გოლი აძლევს, რომელთაგან 8 ჩემპიონთა ლიგის მატჩებშია დაგროვებული.
“გუნდში იურგენ კლოპის მოსვლის შემდეგ, ახალ პოზიციაზე მიწევდა თამაში – თავდამსხმელი უნდა ვყოფილიყავი. მართალია, ამ ამპულაში ადრე ჩემი შესაძლებლობები არ გამომიცდია, მაგრამ ახლა ყველაფერს ვეჩვევი.
რაც უფრო მეტი დრო გადის, მით უფრო მომწონს ეს პოზიცია და თავსაც უფრო კომფორტულად ვგრძნობ. ვთვლი, რომ ახალ პოზიციას სრულფასოვნად დავეუფლე.
ძალიან ბევრს ვმუშაობ, რათა ჩემს თანაგუნდელებს დავეხმარო. ჩემთვის მხოლოდ გოლები არ არის მნიშვნელოვანი და ვცდილობ, საგოლე გადაცემებიც გავაკეთო. გოლი უბრალოდ ნაყოფია ჩვენი მუშაობის. შესაბამისად, ყოველთვის მიხარია, როცა გოლი გამაქვს,” – აცხადებს ბრაზილიელი ფეხბურთელი.
