როდის შედგება მესის დებიუტი “პარი სენ-ჟერმენში”?

“პარი სენ-ჟერმენმა” ზაფხულის სატრანსფერო ფანჯარაზე შეუძლებელი შეძლო და მსოფლიოს ერთ-ერთი საუკეთესო ფეხბურთელი, ლეო მესის სახით, უფასოდ გადაიბირა. არგენტინელმა გოლეადორმა ახალ კლუბში ვარჯიში უკვე დაიწყო.

როგორც იცით, ლიგა 1-ის სეზონი უკვე დაწყებულია. “პარი სენ-ჟერმენი” მომდევნო მატჩს 14 აგვისტოს გამართავს “სტრასბურგის” წინააღმდეგ, თუმცა იქიდან გამომდინარე, რომ ლეო 10 აგვისტოს გადაბარგდა პარიზში, მისი თამაში თითქმის გამორიცხულია.

ლეო ემსიმ სეზონი კოპა ამერიკის მოგებით დახურა და მას შემდეგ შვებულებაში იმყოფებოდა. დიდი ალბათობით მისი დებიუტი ახალ კლუბში 29 აგვისტოს შედგება “რეიმსის” წინააღმდეგ. მეორე ვარიანტად კი 12 სექტემბერს “კლერმონთან” გასამართ შეხვედრას მოისაზრებენ.

“არ ვიცი როდის შედგება ჩემი დებიუტი. ახლახან დავბრუნდი შვებულებიდან. ნამდვილად არ ვიცი, როდის დავბრუნდები მოედანზე. მწვრთნელს გუშინ შევხვდი და ალბათ, რაღაც ვარჯიშების გავლა დამჭირდება,” – განაცხადა ლეომ.