რომელ ენაზე ესაუბრებიან ბელგიელი ფეხბურთელები ერთმანეთს?
ფეხბურთში სასაუბრო ენა ძალიან მნიშვნელოვანია. როცა მწვრთნელი მითითებებს გაძლევს ან თანაგუნდელთან საუბარი გსურს, მისი უნდა გესმოდეს.
საინტერესოა, რომელ ენაზე ესაუბრებიან ბელგიის ნაკრების ფეხბურთელები ერთმანეთს, მაშინ, როცა ბელგია მრავალენოვანი ქვეყანაა და მისი ოფიციალური ენები ჰოლანდიური, ფრანგული და გერმანულია.
“ბიბისის” ცნობით, ფეხბურთელები ერთმანეთს არც ჰოლანდიურად და არც ფრანგულად არ ესაუბრებიან, ისინი ერთმანეთს ინგლისურად ელაპარაკებიან. მაგალითად, ინგლისისა და ბელგიის ნაკრებებს შორის გამართული მატჩის მიმდინარეობისას, ბელგიელები ერთმანეთს ინგლისურად ელაპარაკებოდნენ, რამაც ბრიტანელები გააკვირვა.
ბელგიის მოსახლეობის დიდი ნაწილი, რომელიც ფლანდრიის რეგიონში ცხოვრობს (მოსახლეობა – 6 078 600), ჰოლანდიურად საუბრობს. მოსახლეობის დანარჩენი ნაწილი ფრანგულად ლაპარაკობს, მცირე ნაწილი კი – გერმანულად. შესაბამისად, ბელგიის ნაკრების წევრებს ერთი საერთო მშობლიური ენა არ აქვთ. მაგალითად, კევინ დე ბრუინი გენტში, ფლანდრიის რეგიონში დაიბადა და მისი მშობლიური ენა ჰოლანდიურია, ედენ აზარი კი ვალონიის რეგიონიდან არის და ის ფრანგულად საუბრობს.
2014 წელს, ერთ-ერთ პრესკონფერენციაზე დარბაზში ტომას ვერმაელენი და აქსელ ვიტსელი ერთად გამოცხადდნენ – ვერმაელენმა საუბარი ჰოლანდიურად დაიწყო, ვიტსელმა კი – ფრანგულად.
ეთნიკური მრავალფეროვნება
შესაძლოა, სხვა ქვეყნებში ეს უცნაურად მიაჩნდეთ, მაგრამ ბელგიაში ყველაფერი სასაუბრო ენის მიხედვით იყოფა – პოლიტიკური პარტიები, სკოლები, ჟურნალები და გაზეთები. ამავდროულად, ქვეყანაში ძალიან ბევრი მიგრანტია, ისინი კი არც ჰოლანდიურად საუბრობენ და არც ფრანგულად, ამიტომ მათი საზოგადოებაში ინტეგრირებისათვის ინგლისურ ენას იყენებენ.
ბელგიის ნაკრებშიც რამდენიმე ისეთი ფეხბურთელია, რომელიც მიგრანტთა ოჯახს წარმოადგენს, ამიტომ მათ კიდევ უფრო მეტი ენა იციან. რომელუ ლუკაკუს მშობლები კონგოელი მიგრანტები არიან, თავად ფეხბურთელი ანტვერპენშია დაბადებული. მან ექვსი ენა იცის – ჰოლანდიური, ფრანგული, ინგლისური, ესპანური, პორტუგალიური და სუაჰილური (ერთაშორის ურთიერთობის ენა აღმოსავლეთ აფრიკაში). ნაკრების კაპიტანს, ვინსენ კომპანის საუბარი ხუთ ენაზე შეუძლია.
