რომელი ფეხბურთელები დააკლდება “დინამოს” “ფეიენოორდთან”?
დღეს ევროპა ლიგის მე-3 საკვალიფიკაციო ეტაპის განმეორებით შეხვედრაში “დინამო” როტერდამის “ფეიენოორდს” უმასპინძლებს. “დინამო” შეხვედრას საკმაოდ დიდი დანაკლისით ხვდება.
დისკვალიფიცირებულები არიან აკაკი შულაია, რომელმაც პირველ მატჩში წითელი ბარათი მიიღო და თავდამსხმელი ლევან კუტალია 3 ყვითელი ბარათით. ასევე, შესაძლოა, დღეს კვამე კარიკარიც ვერ ვიხილოთ.
ჰოლანდიაში გუნდს მცირე ტრავმის გამო ფრანგი აბდილ მეჯუბიც ვერ დაეხმარა, თუმცა მეჯუბი დღევანდელი თამაშისთვის მზად არის. მარჯვენა მცველი, ნოდარ იაშვილი “გაბალასთან” მიღებული ტრავმის გამო რეაბილიტაციის კურსს გადის.
46-ე წუთზე შეცვლილი ლევან შენგელია სრულ მზადყოფნაშია და გუშინ ჟურნალისტებთან პრესკონფერენციაზეც გამოჩნდა.
“დინამოს” სამწვრთნელი შტაბი, დიდი ალბათობით, თავდამსხმელ მათე კვირკვიას განაცხადში შეიყვანს და მათეს პირველი შანსი მიეცემა ევროპა ლიგაზე. მოსალოდნელია, გიორგი ზარიამაც მეტი სათამაშო დრო მიიღოს.
სავარაუდო შემადგენლობა: პერალესი – რუხაია, მეჯუბი, მონხილი, ქიმაძე – ნინუა, პაპავა, კუხიანიძე – ქავთარაძე, შენგელია, დაფე
