“საბურთალო” “ატირაუს” შეხვდება
![](https://fanebi.com/wp-content/uploads/2013/12/saburatlo-atletico.jpg)
მორიგი საკონტროლო მატჩისთვის ემზადება თურქეთში შეკრებაზე მყოფი “საბურთალო” – ხვალ, თემურ შალამბერიძის შეგირდები ყაზახურ “ატირაუს” დაუპირისპირდებიან. მატჩი თბილისის დროით 17:30 საათზე დაიწყება. შეგახსენებთ, რომ ხვალინდელი მატჩი რიგით მესამე იქნება. მანამდე ჩვენი გუნდი ჯერ “ჩერნო მორეს” გაეჯიბრა, შემდეგ კი “მონტანასთან” მოსინჯა ძალები.
რაც შეეხება მომავალ მეტოქეს – “ატირაუ” ყაზახეთის ჩემპიონატის უმაღლესი ლიგის ბინადარია. 2012-2013 წლების სეზონზე ჩემპიონატი მერვე ადგილზე დაასრულა. კლუბი 1980 წელსაა დაარსებული, თუმცა “ატირაუს” სახელს 2001 წლიდან ატარებს.
ყაზახურ კლუბში ძირითადად ადგილობრივი ფეხბურთელები თამაშობენ, მაგრამ გუნდში ლეგიონერებიც ასპარეზობენ. უცხოელ ფეხბურთელთა რიცხვში ქართველი გიორგი ფეიქრიშვილიც (საქართველოში ბოლოს “დინამოში” თამაშობდა) არის, რომელმაც გასული სეზონი 10 ნომრიანი მაისურით ჩაატარა. კლუბში ირიცხებიან ნიგერიელი, გერმანელი და ბელორუსი ფეხბურთელები.
“ატირაუ” უკვე რამდენიმე დღეა თურქულ შეკრებაზე იმყოფება. როგორც კლუბის ოფიციალური ვებ-გვერდი იტყობინება, კლუბმა 4 თებერვალს ამხანაგური მატჩი ბულგარეთის “ჩერნო მორესთან” გამართა, რომელიც ფრედ 1:1 დასრულდა. მანამდე გერმანიის რეგიონ ლიგის “ჰაველსთან” 1:2 წააგო. რამდენიმე დღის წინ კი “ზეტას” მოუგო 1:0, ერთადერთი ბურთი მატჩის მიწურულს ყაზახეთის ნაკრების ფეხბურთელმა ალექსეი შეტკინმა შეაგდო.
გუნდის მთავარი მწვრთნელი ვლადიმირ ბელიავსკია. “ატირაუ” საშინაო შეხვედრებს “მუნაის” სახელობის სტადიონზე ატარებს, რომელიც 8690 გულშემატკივარს იტევს. როგორც ჩვენთვის გახდა ცნობილი, ყაზახეთში ახალი 2014-2015 წლების სეზონი მარტის შუა რიცხვებში დაიწყება.
ფეხბურთში ჩახედულ ადამიანებს ეცოდინებათ, თუ როგორი პროგრესი განიცადეს ყაზახებმა შინაურ პირველობაზე. მართალია, სანაკრებო დონეზე წარმატებებით ვერ დაიკვეხნიან, თუმცა საკლუბო დონემ აშკარად იმატა – ფაქტობრივად ყველა კლუბი მაღალ ბიუჯეტიანი გუნდებია, მათ არც ინფრასტრუქტურა დაეწუნებათ. ასე, რომ ოთხშაბათს ჩვენ გუნდს კიდევ ერთი სერიოზული გამოცდის ჩაბარება მოუწევს.
fcsaburatlo.ge