საბურთალოელებმა გუშინდელი მატჩი შეაფასეს
გუშინ “საბურთალომ” შეკრებაზე პირველი ამხანაგური მატჩი გამართა – ჩვენი გუნდისა და “ჩერნო მორეს” შეხვედრა მეტოქის გამარჯვებით 3:2 დასრულდა. ოთხშაბათს გამართულ მატჩზე კომენტარი ჯემალ ტაბიძესა და გიორგი ხორხელს ვთხოვეთ. ფეხბურთელებმა თურქული შეკრების შესახებაც გვიამბეს:
ჯემალ ტაბიძე: “ჩერნო მორესთან” დაძაბული მატჩი გამოდგა, მთლიანობაში მეტოქემ კარგი გუნდის შთაბეჭდილება დატოვა. მატჩის დებიუტი წარუმატებელი გამოგვივიდა, ცოტა არეულები ვიყავით, რაც ორ გაშვებულ გოლში აისახა. თუმცა, შემდეგ, ნელ-ნელა გამოვასწორეთ თამაში და მეორე ნახევარში ჯერ ანგარიშის მინიმუმამდე შემცირება, შემდეგ გათანაბრება მოვახერხეთ. რა თქმა უნდა, ამის მერე ძალები უფრო ვირწმუნეთ, თუმცა სამწუხაროდ შეხვედრის ბოლო წუთებზე მსაჯმა ჩვენს კარში აბსურდული თერთმეტმეტრიანი დანიშნა.
გუშინდელ ჩვენს მოწინააღმდეგეს ეტყობოდა, რომ გამოცდილი კლუბი იყო, მათ არც ტექნიკა დაეწუნებოდათ. რაც უფრო ძლიერ კლუბებთან ვითამაშებთ, ამით უფრო მეტ გამოცდილებას შევიძენთ. სწორედ, ასეთი კლუბების წინააღმდეგ თამაშით უნდა ვისწავლოთ და განვითარდეთ.
რაც შეეხება თურქეთში მზადებას, იდეალურ პირობებში გვიწევს შეკრება, ყველაფერი მაღალ დონეზეა. საწვრთნელი პროცესი გეგმაზომიერად მიმდინარეობს და იმედი მაქვს მეორე წრეს მომზადებულები შევხვდებით”.
გიორგი ხორხელი: “ჩვენი გუშინდელი მეტოქე ბულგარეთის უმაღლესი ლიგის ბინადარი იყო, რომელიც თავის ჩემპიონატში მოწინავეთა შორისაა. აქედანაც ჩანს, რომ ძლიერ მეტოქესთან გვქონდა საქმე. ვცდილობდით წინააღმდეგობის გაწევას, მეტ-ნაკლებად ეს მოვახერხეთ კიდევაც, მაგრამ ბოლო გაშვებულმა გოლმა, ყველას გული დაგვწყვიტა. არადა, შეიძლება ითქვას, თამაში შემოვატრიალეთ…
მეტოქე გუნდი ძირითადად მარცხენა ფლანგიდან გვიტევდა, ბულგარელები მეორე სართულზე განსაკუთრებით აქტიურობდნენ, მაგრამ მატჩის მსვლელობისას “ჩერნო მორეს” თამაშს ავუღეთ ალღო და გამოვასწორეთ, როგორც შედეგი, ასევე ხარისხი.
მთლიანობაში ჩვენს გუნდს ურიგო შთაბეჭდილება არ დაუტოვებია. იმედი მაქვს მომდევნო თამაშებში უფრო უკეთ წარმოვაჩენთ თავს. ძალიან დიდ გამოცდილებას ვიძენთ, რაც მომავალში აუცილებლად წაგვადგება”.
აქვე გეტყვით, რომ მომდევნო შეხვედრას ჩვენი გუნდი ზეგ, 8 თებერვალს ასევე ბულგარეთის უმაღლესი ლიგის წარმომადგენელთან გამართავს. მომავალ სპარინგ-მეტოქეს ხვალ წარვადგენთ.
fcsaburtalo.ge
