“საბურთალომ” “ალექსანდრიას” აჯობა
თურქულ შეკრებაზე გუშინ გამართული მატჩი “საბურთალოსა” და “ალექსანდრიას” მონაწილეობითდაძაბული და საინტერესო გამოდგა და თბილისელთა დამსახურებული გამარჯვებით, 3:2 დასრულდა. უკრაინელებთან წარმატება პირველი აღმოჩნდა თურქულ შეკრებაზე – შეგახსენებთ, რომ “საბურთალომ” ორი მატჩი ფრედ დაასრულა, ერთხელ კი დამარცხდა.
მთლიანობაში მატჩი ლამაზი საყურებელი იყო – პირველი ნახევარი უკრაინელთა კარნახით წარიმართა, თუმცა 45 წუთი გატანილი გოლების გარეშე მორჩა. გოლების წვიმა კი მეორეში წამოვიდა – მცირე რიცხოვანმა გულშემატკივარმა დარჩენილ დროში ხუთი გოლი იხილა. პირველი გოლი საბურთალოელებმა ლამაზი, კომბინაციური შეტევის შემდეგ შეაგდეს, თავი კი ბიძინაშვილმა გამოიჩინა. მალევე მეტოქემ შეხვედრაში წონასწორობა აღადგინა, თუმცა ერთ-ერთ ეპიზოდში დაახლოებით 30 მეტრიდან,ხარაიშვილის უძლიერესი დარტყმის შემდეგ, ბურთი ჯერ ზედა ძელს მოხვდა და ისე აღმოჩნდა “ალექსანდრიას” კარში 2:1. ჩვენი ბიჭები მოპოვებულ უპირატესობას არ დასჯერდნენ და იერიშები განაგრძეს – მესამე გოლი უკვე გურამ გოშთელიანმა შეაგდო, საგოლე გადაცემა კი მარცხენა ფრთიდან გაკეთდა. ამის მერე იყო, რომ ჩაბრაძეს ორჯერ მართებდა მეტოქის კარის აღება, მაგრამ დამამთავრებელ ფაზაში ვერ ივარგა. ბოლო გოლი უკრაინელებმა გაიტანეს, ერთ წუთში კი მსაჯის სასტვენიც გაისმა და საბოლოო ანგარიში, 3:2 დაფიქსირდა.
როგორც ჩვენთვის გახდა ცნობილი, აღნიშნულ შეხვედრას ყაზახეთის უმაღლესი ლიგის კლუბიც ადევნებდა თვალ-ყურს, რომელიც შეკრებაზე იმყოფება. რამდენიმე დღის წინ გამართულ ამხანაგურ შეხვედრაში უკრაინელებს სწორედ ყაზახებისთვის მოუგიათ.
ვულოცავთ ჩვენს გუნდს დღევანდელ გამარჯვებას და მომავალში წარმატებებს ვუსურვებთ.
“საბურთალომ” შემდეგი შემადგენლობით იასპარეზა: გოშაძე, ბარამიძე, მარგველაშვილი, ჩომახიძე, თევზაძე, მამუჩაშვილი, ხარაიშვილი, ლორენცო, წოწონავა, ხორხელი, გოცირიძე.
