“საბურთალოს” შემტევი: “ჩუპო-მოტინგს ფინალის წინ ვესაუბრე”
დედაქალაქური “საბურთალო” ევროპა ლიგის მატჩისთვის ემზადება. გუნდთან ერთადაა კამერუნელი ახალწვეული ოლივიე ბუმალი. “საბურთალოს” გვერდმა კამერუნელთან საინტერესო ინტერვიუ ჩაწერა:
– შთაბეჭდილებები დადებითია – კარგი სავარჯიშო პირობები, სასიამოვნო საწვრთნელი პროცესი, კარგი განწყობა. ძალიან მნიშვნელოვანია, რომ გუნდში მეგობრული ატმესფერო სუფევს. ახლა, მთავარი საფიქრალი მოახლოებული ევროტურნირის მატჩია.
– საქართველოში როგორ მოხვდით? მანამდე თუ გსმენიათ ჩვენს ქვეყანაზე?
– მენეჯერი დამიკავშირდა, რომელმაც საქართველოში, კერძოდ “საბურთალოში” თამაში შემომთავაზა. მითხრა გუნდის შესახებ, რა მიზნები და გეგმები აქვს, როგორი ტრადიციების კლუბია. ამ ყველაფრის მერე დავფიქრდი და თანხმობა ვუთხარი. წლების წინ თბილისში ჩემი ახლო მეგობარი, დონალდ ჯუსი თამაშობდა, მისგან ვიცოდი საქართველოს შესახებ.
– რა მიზნები გაქვთ ახალ კლუბში?
– მინდა, “საბურთლოსთან” ერთად წარმატებებს მივაღწიო. გუნდს დავეხმარო მაღალი მიზნებისთვის ბრძოლაში. კარგად ვითამაშოთ ევროტურნირებზე და განვითარდეთ. პანდემიის გამო გარკვეული დრო გამიცდა, თუმცა ნელ-ნელა სასურველ ფორმას ვუბრუნდები.
-“საბურთალო” ახალგაზრდული კლუბია, თუმცა გუნდში გამოცდილი ფეხბურთელებიც ირიცხებიან. სხვა ქართველ ფეხბურთელებთან ერთად, თქვენც მოგიწევთ გამოცდილების გაზიარება ქართველ ახალგაზრდებთან…
– მართალია, კლუბის ახალი წევრი ვარ, თუმცა ვხედავ, რომ გამოცდილი ფეხბურთელები ახალგაზრდებს ცოდნას უზიარებენ. მათ რიცხვს ნელ-ნელა მეც შევუერთდები. სამწვრთნელო შტაბიც გამოცდილია, საინტერესო და სასიამოვნო ვარჯიშები გვაქვს.–
რამდენიმე ევროპულ კლუბში გითამაშიათ. ყველაზე წარმატებულ დროს სად გაიხსენებთ?
– ჩემს კარიერაში ბევრი კარგი დრო მახსენდება, ერთ-ერთი ასეთი “პანათინაიკოსში” გატარებული დროა. სასიამოვნოდ ვიხსენებ ჩინეთსა და იაპონიაში განვლილ წლებს. თუმცა, ჩემთვის ყველაზე ძვირფასი ეროვნულ ნაკრებთან ერთად თამაშია. ქვეყნის პირველ გუნდში გამოძახებას ახლაც ველოდები, მაგრამ ჯერ “საბურთალოში” უნდა დავამტკიცო, რომ თამაშის ღირსი ვარ.
– კვიპროსის გუნდის წინააღმდეგ თუ გითამაშიათ?
– 2006-2007 წლებში, როდესაც “პანათინაიკოსში” ვთამაშობდი, იმ დროს “ომონიას” ამხანაგურად ვეთამაშეთ. მეტოქემ სასიამოვნო ფეხბურთი ითამაშა. ვიცი, რომ “აპოლონი” ხშირად თამაშობს ევროპა ლიგის ჯგუფურ ეტაპზე.
– რა მოლოდინი გაქვთ კვიპროსელებთან მატჩის წინ?
– ეს თამაში, როგორც კლუბისთვის, ასევე თითოეული ფეხბურთელისთვის ძალიან მნიშვნელოვანია. ასეთ თამაშებში იძენ გამოცდილებას, ბევრ რამეს სწავლობ. ერთად დგომით, ბრძოლითა და მონდომებით შეგვიძლია გამარჯვებაზე ვიფიქროთ, მაქსიმუმი უნდა გავიღოთ. ფეხბურთია, სპორტში კი ყველაფერი ხდება. ვფიქრობ, შანსები თანაბარია, მიუხედავად იმისა, რომ ერთ მატჩიან თამაშს სტუმრად ვთამაშობთ.
– ბევრ ცნობილ ვარსკვლავთან მეგობრობთ, მათ შორის კამერუნელ ჩუპო-მოტინგთან. ესაუბრეთ ჩემპიონთა ლიგის ფინალური მატჩის შემდეგ?
– ჩუპო-მოტინგს ფინალის დღეს ვესაუბრე. ვილაპარაკეთ პსჟ-ს შანსებზე, იმ დღის მნიშვნელობაზე. რა თქმა უნდა, წარმატება ვუსურვე. სამწუხაროა, რომ ჩემი თანამემამულე დამარცხდა, თუმცა ცხოვრება გრძელდება და იმედი მაქვს, სხვა დროს მიეცემა გამარჯვების შესაძლებლობა.
კამერუნის ნაკრების ფეხბურთელებს მიმოწერა გვაქვს, ხშირად ვსაუბრობთ-ხოლმე და მოვიკითხავთ ერთმანეთს. როდესაც სანაკრებო მატჩები ახლოვდება, ყველას ძალიან გვიხარია.
Fcsaburtalo.ge
