საგურამოში “ლოკომოტივის” ბაზის მიმდებარე ტერიტორიაზე, ფინური სკოლის აშენება იგეგმება
საგურამოში, თბილისის ლოკომოტივის საფეხბურთო ბაზის მიმდებარე ტერიტორიაზე, ფინური სკოლის აშენება იგეგმება.
27 იანვარს, საგურამოში, ლოკომოტივის ბაზაზე, ალიანს ჯგუფი ჰოლდინგის დამფუძნებელი, აიეტ კუკავა ბიზნესის წარმომადგენლებს შეხვდა და პროექტის შესახებ დეტალური ინფორმაცია წარადგინა.
შეხვედრა ლოკომოტივის ტექნიკურმა დირექტორმა გიორგი ყიფიანმა გახსნა, რომელმაც საგურამოში, ფინური სკოლის აშენების მნიშვნელობაზე ისაუბრა.
“ჩვენი კლუბი 10 წელზე მეტია, რაც საგურამოში ინფრასტრუქტურას ანვითარებს. ვფიქრობთ, ლოკომოტივის ბაზის მიმდებარე ტერიტორიაზე, ფინური სკოლის აშენება საგურამოს დიდ სარგებელს მოუტანს.
აქ, პროექტის განსახორციელებლად შესანიშნავი გარემოა. საგურამოში, განათლების მიმართულებით განსახორციელებელი ინვესტიცია განსაკუთრებით მნიშვნელოვანია იმ კუთხითაც, რომ ლოკომოტივის ბაზაზე, სასკოლო ასაკის 10-ზე მეტი ასაკობრივი გუნდი ვარჯიშობს”. – ამბობს ყიფიანი.
ალიანს ჯგუფი, საერთაშორისო პარტნიორებთან ერთად, ახორციელებს მსოფლიოში ერთ-ერთ საუკეთესო – ფინური სასკოლო განათლების სისტემის დანერგვას საქართველოში.
ფინური სკოლა საგურამოში, 7 ჰექტარ მიწის ფართობზე აშენდება. პროექტი 15-20 მილონი ევროს ინვესტირებას ითვალისწინებს. საერთაშორისო სკოლის მიმდებარე ტერიტორიაზე მრავალპროფილიანი ინფრასტრუქტურის შექმნაც იგეგმება.
სკოლიდან 5-10 კილომეტრის რადიუსში მცხოვრები მოსახლეობისთვის, სამედიცინო-სადიაგნოსტიკო, სხვადასხვა პროფილის მომსახურების კლინიკები, ასევე ბავშვებისთვის, გასართობი ცენტრები და სკვერები აშენდება.
ფინური სკოლა 2019 წლის სექტემბერში გაიხსნება.
