მერსესაიდულ დერბიში სალაჰისა და კოუტინიოს თამაში საეჭვოა
მერსესაიდის “ლივერპულის” ორი ლიდერის, მუჰამედ სალაჰისა და ფილიპე კოუტინიოს თამაში “ევერტონთან” დიდი კითხვის ნიშნის ქვეშ დგას. შეგახსენებთ, რომ ტრავმის გამო ამ ფეხბურთელებმა “ბარნლისთან” გამართული შეხვედრაც გამოტოვეს.
“ფილი და მო ტრავმირებულები არიან და ამ დრომდე ლაზარეთში იმყოფებიან. სწორედ ამიტომ ვერ ითამაშეს მათ “ბარნლისთან”. ჯერჯერობით გაურკვეველია ისიც, შეძლებენ თუ არა “ევერტონთან” გასამართ მატჩში მონაწილეობის მიღებას,” – აცხადებს მერსესაიდელთა თავკაცი იურგენ კლოპი.
მიმდინარე სეზონში სალაჰი “წითლების” ნამდვილ ლიდერად მოგვევლინა – ჩატარებულ 27 მატჩში მან 22 გოლი გაიტანა და ექვსი საგოლე გადაცემაც გააკეთა. კოუტინიოს ანგარიშზე კი 20 მატჩში გატანილი 12 გოლი და რვა საგოლე გადაცემაა.
“ლივერპული” “ევერტონს” ინგლისის ასოციაციის თასის 1/32-ფინალურ მატჩში 5 იანვარს დაუპირისპირდება.
