“სამტრედია” უკრაინელმა ლეგიონერებმა დატოვეს

უკრაინელი მცველები, დმიტრო ულიანოვი და ეგორ სმირნოვი “სამტრედიას” ღირსებას აღარ დაიცავენ. ფეხბურთელებმა კლუბი ურთიერთშეთანხმების საფუძველზე დატოვეს.

შეგახსენებთ, რომ ულიანოვი “სამტრედიას”  2018 წლის 27 ივნისს შეუერთდა და 2 მატჩში მიიღო მონაწილეობა. ეგორ სმირნოვმა კონტრაქტი 2018 წლის 25 ივლისს გააფორმა და 3 შეხვედრა ძირითადში დაიწყო, 2-ში კი ცვლილებაზე შევიდა. მიმდინარე სეზონში მას ერთი გატანილი ავტოგოლიც უფიქსირდება.

“სამტრედიას” 28 ტურის შემდეგ 18 ქულა აქვს და ჩემპიონატში დარჩენისთვის იბრძვის. გუნდში 4 ლეგიონერი, იგორ კოშმანი, სერგეი პოგორილი (ორივე უკრაინა), ივან ფატიჩი (მონტენეგრო) და მიხეილ გორელიშვილი (რუსეთი) ირიცხება.