“სამტრედიას” ლეგიონერი: “ჩემს მშობლებს კორონა ვირუსი დაუდგინეს”
“სამტრედიას” ესპანელი ნახევარმცველის, დიეგო დიზის მშობლებს კორონავირუსი დაუდასტურდათ.
ესპანური გამოცემები კი დიზის მდგომარეობით დაინტერესდნენ და მასთან ინტერვიუ ჩაწერეს.
“წარმოიდგინეთ, რა ცუდ სიტუაციაში ვიყავი. ჩემს მშობლებს ესპანეთში კორონავირუსი დაუდასტურდათ, საავადმყოფოში გადაიყვანეს, მე კი მათგან კილომეტრებით შორს ვარ. ნერვიულობისგან, ღამე არ მეძინა. მშობლებთან მხოლოდ ვიდეო-ზარით ვკონტაქტობდი. საქართველოდან ესპანეთში წასვლა არ შემეძლო, რადგან 14-დღიანი სავალდებულო კარანტინი უნდა გამევლო და შესაძლოა, ჩემპიონატის განახლებას დამთხვეოდა. ახლა მამაჩემი თავს კარგად გრძნობს, დედაჩემი კი კვლავ დაინფიცირებულია.
საქართველოში კიდევ ერთი ესპანელი – ხოსე პერალესი თამაშობს. ჩემგან განსხვავებით, მან ესპანეთში წასვლა არჩია. ქუჩებში ხალხი დადის, მე მხოლოდ საყიდლებზე დავდივარ, იზოლაციაში ვარ და ვერ ვხედავ ვერც ბურთს, ვერც ბარათებს.
ისლანდიაში თამაშით კმაყოფილი ვიყავი, იქ მაღალი ანაზღაურება და კარგი პირობები იყო, თუმცა ახალი გამოწვევის მიღება მსურდა. აგენტი დამიკავშირდა და საქართველოში გადასვლა მირჩია, რაზეც დავინტერესდი.
ქართული კულტურა სხვებისგან სრულიად განსხვავებულია, რითიც გაკვირვებული ვარ. საქართველო იმაზე განვითარებული ქვეყანაა, ვიდრე მეგონა. მათი ფეხბურთელები ტექნიკური თამაშით გამოირჩევიან. საქართველოში ფეხბურთი ისლანდიელებზე მეტადაც უყვართ. აქ ტაქსის მძღოლებიც ფეხბურთზე მესაუბრებიან”, – აცხადებს დიზი.
ესპანური გამოცემა იმას აღნიშნავს, რომ “სამტრედიაში” ესპანელის თამაშს დადებითად ახასიათებენ. იქ ნახსენებია, რომ ჩვენი კლუბი 2016 წელს ჩემპიონი გახდა და საქართველოს ყველა დროის საუკეთესო ფეხბურთელი კახა კალაძეა, რომელმაც ჩემპიონთა ლიგა 2-ჯერ მოიგო.
FCsamtredia
