საქართველოს ძიუდოს ფედერაცია ნუგზარ ტატალაშვილთან დაკავშირებულ ამბავს გამოეხმაურა
26 ივლისს JudoInside.com-მა გაავრცელა ინფორმაცია, რომლის თანახმადაც ქართველი ძიუდოისტი, ნუგზარ ტატალაშვილი სექტემბრიდან არაბთა გაერთიანებული საამიროების სახელით იასპარეზებდა.
საქართველოს ძიუდოს ფედერაცია ადასტურებს, რომ არაბთა გაერთიანებულ საამიროებს ქართველი სპორტსმენის საკუთარ ქვეყანაში წაყვანის სურვილი ჰქონდათ, თუმცა დებულებიდან გამომდინარე ეს მინიმუმ ორი წლის განმავლობაში ვერ მოხდება.
გთავაზობთ განცხადებას, რომელიც საქართველოს ძიუდოს ფედერაციამ გაავრცელა:
“დღეს გავრცელდა ინფორმაცია სპორტსმენ ნუგზარ ტატალაშვილის არაბთა გაერთიანებულ საემიროში გადასვლასთან დაკავშირებით. საქართველოს ძიუდოს ეროვნული ფედერაცია ადასტურებს, რომ მათი მხრიდან იყო მოთხოვნა აღნიშნული სპორტსმენის მათი დროშის ქვეშ გამოსვლასთან დაკავშირებით, თუმცა ჩვენი მხრიდან ერთმნიშვნელოვნად იქნა ნათქვამი უარი, გამომდინარე იმ დებულებიდან, რომელიც მიღებული აქვს საქართველოს ძიუდოს ეროვნული ფედერაციის აღმასრულებელ კომიტეტს 2013 წლის 23 მაისს:
საქართველოს ძიუდოს ეროვნული ფედერაციის დებულება ძიუდოისტთა სხვა ქვეყნის სახელით გამოსვლასთან დაკავშირებით:
საქართველოს ძიუდოისტთა ეროვნული ნაკრები გუნდის წევრს, რომელიც მოისურვებს სხვა ქვეყნის სახელით გამოსვლას, მინიმუმ ორი წლის განმავლობაში ეთქვას უარი მოთხოვნის დაკმაყოფილებაზე. ნაკრები გუნდის წევრად განისაზღვროს სპორტსმენი, რომელსაც ერთხელ მაინც მიუღია მონაწილეობა საერთაშორისო ტურნირზე სახელმწიფოს დაფინანსებით. აღნიშნული წესი ძალაში შევიდეს 2013 წლის 23 მაისიდან. რაც შეეხება სხვა დანარჩენ შემთხვევებს, რომელსაც ადგილი ჰქონდა ამ დრომდე, საქართველოს ძიუდოს ფედერაციის აღმასკომი იტოვებს უფლებას ინდივიდუალურად განიხილოს საკითხი თითოეულ სპორტსმენთან მიმართებაში.
საქართველოს ძიუდოს ეროვნული ფედერაცია მოუწოდებს ყველა სააგენტოს თავი შეიკავოს დეზინფორმაციის გავრცელებისგან”, – ვკითხულობთ საქართველოს ძიუდოს ფედერაციის განცხადებაში.
