საქართველოს ნაკრების გაფართოებული შემადგენლობა რაგბი ევროპის ჩემპიონატის პირველი ორი მატჩისათვის

თარიღი: იანვარი 25, 2019

ბორჯღალოსნების სამწვრთნელო შტაბმა 2019 წლის პირველი ორი მატჩისთვის გაფართოებული შემადგენლობა დაასახელა. გუნდი გამოცდილი და ახალგაზრდა მოთამაშეების ნაზავს წარმოადგენს, რომელთაგან ხუთს, ბორჯღალოსნების კვართით ჯერ არ უთამაშია, ხოლო 7-ს, 10 კეპიც არ უგროვდება.

2018 წლის რაგბი ევროპაზე (რომელიც მსოფლიო თასის შესარჩევი ეტაპიც იყო) განვითარებული მოვლენების შემდეგ, რუმინეთი, ესპანეთი და ბელგია დაისაჯნენ და შედეგად, მათ ბოლო სამი ადგილი დაიკავეს, რის გამოც წლევანდელ რაგბი ევროპის პირველ ორ მატჩში საქართველოს მეტოქეები მთავარი კონკურენტები, რუმინეთი და ესპანეთი იქნებიან.

ბორჯღალოსნები რუმინელებს 9 თებერვალს კლუჟში, საქართველოს დროით 16 საათზე შეხვდებიან, ხოლო ესპანეთს „ავჭალაზე“ 17 თებერვალს, 18 საათზე უმასპინძლებენ. ტურნირის ძლიერ მეტოქეებთან მატჩებით დაწყება სიახლე და გამოწვევაა მილთონ ჰეიგისთვის, ხოლო დებიუტანტი და შედარებით ახალბედა მორაგბეებისთვის შანსი, საუკეთესოდ წარმოაჩინონ საკუთარი შესაძლებლობები.

„რაგბი ევროპის პირველი ორი ტურისთვის, ტრადიციულად, ახალგაზრდა ბიჭები გამოვიძახეთ. გვსურს ვნახოთ, თუ შეუძლიათ მათ იმ დონეზე თამაში, რომელსაც ჩვენ ვითხოვთ. გარდა ამისა, არიან ბიჭები, რომლებიც სანაკრებო გარემოში ჯერ არ ყოფილან და მოდით ვნახოთ, რას მოუტანენ ისინი გუნდს“

„ეს იდეალური გამოწვევაა – რაღაც, რაც ჩვენთვის სიახლე და ამავდროულად, ძალიან საინტერესოცაა. ეს იმის მაუწყებელია, რომ ძალიან კარგად უნდა მოვემზადოთ და მოთამაშეებმაც უნდა გაიაზრონ, თუ რა არის მნიშვნელოვანი. ალბათ გახსოვთ, რომ ბოლო 12 თვის განმავლობაში რუმინეთმა და ესპანეთმა დიდი ვნებათაღელვა გადაიტანეს. ორივეს ნატურალიზირებულ მოთამაშეთა დაშვების გამო პრობლემები ჰქონდათ, რამაც ისინი მსოფლიო თასს მიღმა დატოვა. ისინი მოტივირებული იქნებიან და ჩვენს დამარცხებას ეცდებიან. ამ გამოწვევას პირველიდან ბოლო წუთამდე შესაბამისად უნდა მოვეკიდოთ“ – ამბობს მილთონ ჰეიგი.

ხუთი დებიუტანტი და შვიდი ახალბედა

29-კაციან რაზმში 12 ბექი და 17 მორკინალია. ხუთ მორკინალს ბორჯღალოსნების კვართით ჯერ არ უთამაშიათ, თუმცა რამდენიმე მათგანი სანაკრებო შეკრებაზე ადრეც ყოფილა. რუმინეთთან და ესპანეთთან დებიუტის შანსი ექნებათ მარნეულის ‘არმაზის’ კვაჭ გიორგი ხუროშვილს, რუმინეთის სუპერ-ლიგის ‘ჩე ეს ემ ბუქარესტის’ მეორეხაზელ დავით გიგაურს, ‘ლელო-სარასენსის’ მეორეხაზელ გრიგორ ქერდიყოშვილს და პრო დე2-ის ორიაკის მესამეხაზელებს – გიორგი ჯავახიას და ბექა საღინაძეს. აღსანიშნავია, რომ გიორგი ხუროშვილს, გიორგი ჯავახიასა (ორივე 2016) და ბექა საღინაძეს (2017-2018) 20 წლამდელთა ნაკრებში ახალგაზრდულ მსოფლიო ჩემპიონატებზე უთამაშიათ.

დებიუტანტების შესახებ ჰეიგი ამბობს:

„ამ მოთამაშეთაგან სამი, ნაკრების გარემოცვაში, გაფართოებულ შემადგენლობაში, ან სავარჯიშო გარემოში ადრეც მოხვედრილა. დავითი ჩვენი თვალთახედვის არეში  ახლახანს მოხვდა და დროის მოკლე მონაკვეთში ჩვენზე უდიდესი შთაბეჭდილება მოახდინა. ყველა ეს მოთამაშე ათლეტური და ღონიერია. ჩვენ მოუთმენლად ველით საქართველოს კვართით მათ თამაშს“.

შერკინების პირველ ხაზში ორი გამოცდილი მორაგბეა – კვაჭი შალვა მამუკაშვილი და ბურჯი ლევან ჩილაჩავა, დანარჩენებს კი ბორჯღალოსნების კვართით 10 და ნაკლები თამაში ჩაუტარებიათ.

„ყველანი ძალიან ახალგაზრდები არიან, თუმცა ჩვენ მათ ვენდობით! გურამ გოგიჩაშვილი ტოპ 14-ში ერთ-ერთი საუკეთესო პირველი ნომერია, ხოლო გიგაშვილი და მელიქიძე სისტემატურად თამაშობენ თავიანთ გუნდებში. მატარაძეც სისტემატურად ხვდება პრო დე2-ის ერთ-ერთი ლიდერის, ‘ნევერის’ სასტარტო შემადგენლობაში და ჩვენ მისი თამაშის ხარისხით კმაყოფილები ვართ. რა თქმა უნდა, გამოცდილება მეტად მნიშვნელოვანია, მაგრამ მიდგომაც არანაკლებ როლს თამაშობს და ვთვლით, რომ ამ მხრივ ამ მორაგბეებს ყველაფერი რიგზე აქვთ“.

მეორე ხაზში ბრუნდება გიორგი ნემსაძე, რომელსაც ნოემბერში თიბისის სერიები ტრავმების გამო გაუცდა და რომელიც თებერვლის მატჩებისთვის გამოძახებულ რაზმში ყველაზე ასაკოვანია (34 წლის). გამოძახებულთა შორისაა ნოდარ ჭეიშვილი, რომელმაც 2018 წელს ერთის გარდა ყველა მატჩში მიიღო მონაწილეობა.

მესამე ხაზში ორი დებიუტანტის გარდა ბექა გორგაძე და გიორგი ცუცქირიძე, ასევე გამოცდილი გიორგი თხილაიშვილი ითამაშებენ.

ბურჯ თორნიკე მატარაძეს ნაკრების კვართით შარშანდელი რაგბი ევროპის პირველი მატჩის შემდეგ, აღარ უთამაშია. ნაკრებს ხანგრძლივი შესვენების შემდეგ უბრუნდება ხაზის ორი მოთამაშე – გიორგი აფციაურმა ბოლოს 2016 წლის ნოემბერში, შოტლანდიის წინააღმდეგ ითამაშა, ხოლო მირიან მოდებაძე ქვეყნის მთავარ გუნდში სამივე კეპი 2017 წლის ნოემბერში მოაგროვა და მას შემდეგ ტრავმას მკურნალობდა.

რაზმში ყველაზე მეტი, 88 კეპი ლაშა მალაღურაძის ანგარიშზეა, რომელსაც ასევე ყველაზე მეტი, 184 ქულა აქვს მოხვეჭილი. იტალიასთან მატჩში მიღებული ტრავმის შემდეგ, ნაკრებს უბრუნდება სოსო მათიაშვილი, რომელიც ბოლო დროს მთავარი დამრტყმელია და 14 შეხვედრაში გუნდს 125 ქულით შეეწია. შეკრებაზე მყოფთაგან ყველაზე ახალგაზრდა მგეზავი თედო აბჟანდაძეა, რომელსაც დებიუტი ნოემბერში, სამოასთან ჰქონდა, ტონგას წინააღმდეგაც ითამაშა და ჯამში 22 ქულა მოაგროვა.

მზადება მსოფლიოსთვის

რუმინეთისთვის მზადებას ნაკრები ოფიციალურად 4 თებერვლიდან შეუდგება, მანამდე კი, მომავალ კვირაში, „მსოფლიო რაგბის“ მე-9 რეგულაციის თანახმად, თბილისში სამი დღით შეიკრიბება.

„ტრადიციულად, მე-9 დებულებით გათვალისწინებული შეკრება, ძირითადი შეკრების წინ მორაგბეებისთვის ეროვნული ნაკრების სამუშაო სისტემისა და წესების გაცნობას ემსახურება. ის ასევე გვაძლევს შესაძლებლობას, გავმართოთ ფიტნეს-ტესტები და დავრწმუნდეთ, რომ მორაგბეების ფიზიკური ფორმა საერთაშორისო რაგბის მოთხოვნებს შეესაბამება“.

„მომდევნო, „მატჩის კვირა“ რუტინული იქნება და ნაკრები ჩვეული წესით შეუდგება თამაშისთვის მზადებას, სეზონისწინა შეკრება კი მოგვცემს საშუალებას, რომ უკეთ მოვემზადოთ რუმინეთთან ბრძოლისთვის“ – ამბობს ჰეიგი.

რადგან 2019 მსოფლიო თასის წელია, წლევანდელი რაგბი ევროპა ახალგაზრდა მოთამაშეთა გამოცდას და ნაკრებისთვის სიღრმეების შექმნას ემსახურება:

„რეალურად, ეს ბოლო ტურნირია მსოფლიო თასამდე და უმნიშვნელოვანესი შესაძლებლობა, რომ იაპონიაში გამგზავრებამდე გუნდში პოზიციებზე სიღრმეები შევქმნათ. გარდა ამისა, კარგი შესაძლებლობაა მოთამაშეთა სარაგბო უნარების დასახვეწად“.

„საინტერესოა ახალგაზრდების გამოცდა საერთაშორისო ტურნირზე, მათზე დაკვირვება, როგორც მოედანზე, ასევე მის მიღმა, რაც არანაკლებ მნიშვნელოვანია. ჩვენი აზრით, მათ შეუძლიათ მაღალ დონეზე თამაში და აუცილებლად უნდა ითამაშონ რუმინეთისა და ესპანეთის მსგავსი გუნდების წინააღმდეგ, რათა შეიძინონ გამოცდილება და საკუთარი შესაძლებლობების ირწმუნონ. თუ ისინი ამ ეტაპს წარმატებით გაივლიან, მწვრთნელებს მეტი მოტივაცია გვექნება მსოფლიო თასის წინა შეკრებაზე მათ გამოსაძახებლად“.

მსგავსი სიახლეები
რაგბი

გიორგი ნემსაძემ დმიტრი მოროზოვის განცხადებაზე კომენტარი გააკეთა

საქართველოს მორაგბეთა ნაკრების მთავარმა მწვრთნელმა მილტონ ჰეიგმა და გუნდის კაპიტანმა, გიორგი ნემსაძემ რუსეთის რაგბის განვითარების […]...
წაკითხვა
რაგბი

მოროზოვი: “რუსეთის ნაკრების საქართველოსთან შედარება სასაცილოა – ზელანდიას უნდა

რუსეთის რაგბის განვითარების კომიტეტის ერთ-ერთმა წევრმა და რაგბის კავშირში მომუშავე დმიტრი მოროზოვმა განაცხადა, რომ რუსეთის […]...
წაკითხვა
რაგბი

პირველი არხის განცხადება „რაგბი ევროპის ჩემპიონატის“ მატჩის რეპორტაჟთან დაკავშირებით

პირველმა არხმა რაგბი ევროპის ჩემპიონატის მატჩების ტრანსლაციასთან დაკავშირებით განცხადება გაავრცელა, რომელსაც უცვლელად გთავაზობთ: “პირველი არხი [...
წაკითხვა
რაგბი

საქართველოს ნაკრების შემადგენლობა ესპანეთთან მატჩისათვის

ბორჯღალოსნების სამწვრთნელო შტაბმა, 2019 წლის პირველი საშინაო მატჩისთვის 23-კაციანი განაცხადი დაასახელა. წელს ჩვენი გუნდი საქართველოში […]...
წაკითხვა
რაგბი

რაგბის მსოფლიო რეიტინგში ცვლილებებია

რაგბის მსოფლიო რეიტინგის 11 თებერვლის მონაცემების გამოქვეყნების შემდეგ, საქართველოს ნაკრებმა 1 პოზიციით წინ წაიწია. საქართველომ […]...
წაკითხვა
რაგბი

თედო აბჟანდაძე “ბრივში” ითამაშებს

ბორჯღალოსანმა მგეზავმა თედო აბჟანდაძემ, პრო დე2-ის ერთ-ერთ ლიდერ ‘ბრივთან’ 3-წლიანი კონტრაქტი გააფორმა და მომავალ სეზონს […]...
წაკითხვა
რაგბი

ქართველი მორაგბეები რუმინეთთან გამარჯვების შემდეგ (ვიდეო)

საქართველოს ნაკრებმა რაგბი ევროპის ჩემპიონატი გამარჯვებით დაიწყო. მილთონ ჰეიგის გაწვრთნილმა გუნდმა გათამაშების პირველ ტურში რუმინეთს […]...
წაკითხვა
რაგბი

რაგბი ევროპა | საქართველოს ნაკრების შემადგენლობა რუმინეთთან მატჩისათვის

ბორჯღალოსანთა სამწვრთნელო შტაბმა, 2019 წლის პირველი მატჩისთვის შემადგენლობა დაასახელა და მასში სამი დებიუტანტია. რაგბი ევროპის […]...
წაკითხვა
რაგბი

საქართველოს ნაკრებს სოსო მათიაშვილი გამოაკლდა

ბორჯღალოსნებმა რაგბი ევროპის პირველი ორი მატჩისთვის, რომლებსაც 9 თებერვალს რუმინეთთან (კლუჟში საქართველოს დროით 16 საათზე) […]...
წაკითხვა
რაგბი

World Rugby: სოსო მათიაშვილმა ყველა დროის ერთ-ერთი საუკეთესო ლელო დადო (ვიდეო)

მსოფლიო რაგბის ოფიციალური ვებ-გვერდი კვლავ იხსენებს სოსო მათიაშვილის სასწაულ ლელოს, რომელიც მან კანადას წინააღმდეგ 2017 […]...
წაკითხვა
რაგბი

საქართველო ექვს ერშია – ჯერ მხოლოდ ერთი მსაჯით!

ქართველი მსაჯების – შოთა თევზაძისა და ნიკა ამაშუკელის კარიერული წინსვლა თავბრუდამხვევი ტემპებით მიმდინარეობს. 2019 წელს […]...
წაკითხვა
რაგბი

გორგოძისა და ჩილაჩავას ლელოები ერთ შეხვედრაში (ვიდეო)

16 დეკემბერს, ევროპის ჩემპიონთა თასის მე-4 ტურში “მონპელიემ” საკუთარ მოედანზე “ტულონი” მიიღო და მეტოქე დამაჯერებლად […]...
წაკითხვა
რაგბი

ზურაბ ჟვანია მასზე 30 კილოგრამით მძიმე ბურჯის წინააღმდეგ (ვიდეო)

24 ნოემბერს საქართველოს მორაგბეთა ნაკრებმა მიხეილ მესხის სახელობის სტადიონზე ტონგას უმასპინძლა და მეტოქე 20:9 დაამარცხა. […]...
წაკითხვა
რაგბი

საქართველოს ნაკრების შემადგენლობა ტონგასთან მატჩში

ბორჯღალოსანთა სამწვრთნელო შტაბმა 2018 წლის ბოლო მატჩისთვის 23 მორაგბე დაასახელა. თიბისი რაგბის სერიები 2018-ის დასკვნით […]...
წაკითხვა
რაგბი

საქართველოს ნაკრებმა სამოა დაამარცხა!

17 ნოემბერს, საქართველოს მორაგბეთა ნაკრები ნოემბრის საერთაშორისო ტესტ-სერიის მატჩში ავჭალის სტადიონზე სამოას დაუპირისპირდა და მეტოქე […]...
წაკითხვა