შაბათს IRB თბილისის თასი 2014-ის პირველი რაუნდის მატჩები გაიმართება
ამ შაბათს სტარტს იღებს თბილისის თასის 2014 წლის გათამაშება. 14 ივნისიდან საქართველო, ესპანეთი, მზარდი იტალია და არგენტინის იაგუარები თბილისის თასის მოსაპოვებლად ასპარეზობას ავჭალის სარაგბო სტადიონზე შეუდგებიან.
აღნიშნული ტურნირი, რომელიც რაგბის საერთაშორისო საბჭოს, მეორე დონის ქვეყნებისათვის შეჯიბრების ოდენობის მომატების გეგმის ნაწილს წარმოადგენს, სამ სამატჩო დღეს გაიმართება (14, 18 და 22 ივნისი). ყოველ სამატჩო დღეს ორი შეხვედრა ჩატარდება, რომლებიც შესაბამისად 17 და 19 საათზე დაიწყება. ტურნირის პირველ მატჩში, ევროპის ერთა თასის ძველი მეტოქეები, საქართველო და ესპანეთი დაუპირისპირდებიან. მატჩის შედეგი გუნდების საერთაშორისო რეიტინგზე იმოქმედებს.
IRB თბილისის თასი – რაგბის საერთაშორისო საბჭოს მიერ დაარსებული ტურნირი, რომლის გენერალური სპონსორია ვი თი ბი ბანკი, მნიშვნელოვან როლს თამაშობს მონაწილე ქვეყნების სანაკრებო განვითარებისათვის და საქართველოში რაგბის პოპულარობის გაზრდისათვის. საქართველო ტურნირს მეორედ მასპინძლობს, მას შემდეგ რაც შარშან, პირველი გათამაშება წარმატებულად გაიმართა, რომელშიც სამხრეთ აფრიკის საპრეზიდენტო თხუთმეტეულმა გაიმარჯვა.
ტურნირის პირველი პრესკონფერენცია
დღეს, ავჭალის სარაგბო სტადიონის მედია ოთახში მონაწილე გუნდების მწვრთნელები და კაპიტნები ტურნირის პირველი პრესკონფერენციის გასამართად შეიკრიბნენ.
2014 წლის IRB თბილისის თასის პირველ რაუნდს საქართველოსა და ესპანეთის ნაკრებების მატჩი გახსნის. გუნდები ერთმანეთს ბოლოს მადრიდში, ევროპის ერთა თასზე მარტში შეხვდნენ, სადაც ბორჯღალოსნებმა მასპინძლები 24:17 დაამარცხეს.
მილტონ ჰეიგმა განაცხადა: „რამოდენიმე ძირითადი მოთამაშე გვაკლია, მაგრამ ამით ბევრ ახალგაზრდა მორაგბეს მიეცემა თამაშის შესაძლებლობა, რაც ჩვენს გუნდში უფრო გაზრდის კონკურენციას. მიუხედავად ამისა გუნდში ბევრი გამოცდილი მოთამაშეები გვყავ, რომლებსაც კარგად აქვთ გააზრებული თუ რას ველით მათგან. მნიშვნელოვანია, რომ ესპანეთთან მატჩით კარგად დავიწყოთ ტურნირი. შაბათს ძალიან რთული თამაში გველის ”
ესპანეთის ნაკრების მწვრთნელი სანტიაგო სანტოსი ტურნირს, როგორც თავისი გუნდის გაზრდის საშუალებას განიხილავს: „ჩვენ მიზანს გუნდის განვითარება წარმოადგენს. წელს მსოფლიო თასზე ვერ მოვხვდით და ამიტომ 2019 წლის მსოფლიო თასისთვის გუნდის გაზრდაზე ვაკეთებთ აქცენტს და ეს ტურნირი ამ მიზნისკენ პირველ ნაბიჯს წარმოადგენს. ჩვენთვის დიდი პატივია საქართველოს, იტალიის და არგენტინის წინააღმდეგ თამაში. მოთამაშეები ძალ-ღონეს არ დაიშურებენ საქართველოს წინააღმდეგ, პირველ შეხვედრაში, რომელიც ძალიან დაძაბული იქნება.“
ესპანეთის ნაკრების კაპიტანმა პაბლო ფეიხომ განაცხადა, რომ მასპინძლებთან მის გუნდს რთული მატჩი ელის: „ნამდვილად ურთულესი პირველი მატჩი გვექნება. აქ ჩვენი გუნდის განვითარებისათვის ჩამოვედით. 2015 წლის მსოფლიოზე ვერ მოვხვდით და ამიტომ 2019 წლის მსოფლიო თასს ვუმიზნებთ. საქართველოში ახალგაზრდა, გამოუცდელი, მაგრამ მამაცი და თავდაჯერებული გუნდით ჩამოვედით და საქართველოსთან დიდი ბრძოლა გვექნება. ურთულესი თამაში გველის, მაგრამ ტურნირზე ჩვენ მიზანს განვითარება წარმოადგენს.”
საქართველო-ესპანეთის მატჩის შემდეგ, 19:00 საათზე მზარდი იტალია არგენტინის იაგუარებს დაუპირისპირდება. ბუქარესტში ერთა თასის შარშანდელ გათამაშებაში იტალიელებმა იაგუარები 26-6 დაამარცხეს, აქედან გამომდინარე არგენტინელები რევანშის აღებას ეცდებიან თბილისის თასის პირველი რაუნდის მეორე მატჩში.
იტალიელთა საკმაოდ ახალგაზრდული გუნდის კაპიტანმა ტომასო კასტელომ განაცხადა: „ჩვენ მოტივირებულები ჩამოვედით ტურნირზე და გვსურს კარგად ვითამაშოთ. იაგუარები ფიზიკურად ძლიერი და აგრესიული გუნდია, აქედან გამომდინარე პირველ მატჩში ფიზიკურ კომპონენტს ყურადღება უნდა მივაქციოთ და შესაბამისად მოვემზადოთ.”
იტალიელთა მწვრთნელმა, ანდრეა კავინატომ განაცხადა, რომ გუნდი ეროვნულ პირველობაში მოასპარეზე მოთამაშეებისგან შედგება, რომელთა უმეტესობა 23 წლისაა – “ამ გუნდთან დაკავშირებით გრძელვადიანი გეგმები გვაქვს, რათა გამოვავლინოთ ისინი, ვინც 2019 წლის მსოფლიო თასზე იასპარეზებს. შესაძლოა რამოდენიმე მოთამაშე გაისად ინგლისშიც ვიხილოთ.
არგენტინელთა მწვრთნელის, ბერნარდო ურდანეტას თქმით: „ჩვენ მოთამაშეებს ეძლევათ საშუალება, რომ ანახონ საერთაშორისო დონეზე თუ რის გაკეთება შეუძლიათ. ეს კარგი შეჯიბრია გუნდის განვითარებისთვის და ვეცდებით თამაშიდან თამაშამდე გავაუმჯობესოთ თამაშის ხარისხი.”
IRB თბილისის თასი 2014 მატჩების განრიგი
14 ივნისი, შაბათი
17:00 – აქართველო-ესპანეთი 19:00 – მზარდი იტალია-არგენტინელი იაგუარები
18 ივნისი, ოთხშაბათი
17:00 – საქართველო-არგენტინელი იაგუარები 19:00 – მზარდი იტალია-ესპანეთი
22 ივნისი, შაბათი
17:00 – საქართველო-მზარდი იტალია 19:00 – არგენტინელი იაგუარები-ესპანეთი
