“შუქურას” სენსაციამდე ცოტა დააკლდა
დღეს, “დინამო არენაზე” “დინამოსა” და “შუქურას” შორის საქართველოს თასის 1/8 ფინალური ეტაპის განმეორებითი შეხვედრა შედგა. შეგახსენებთ, ქობულეთში გამართული მატჩი ფრედ, 1:1 დასრულდა და მომდევნო ეტაპზე გამსვლელი გუნდის ვინაობა დედაქალაქში უნდა გარკვეულიყო.
მატჩის პირველი ტაიმი საკმაოდ უსახური გამოდგა. “დინამოელებმა” მხოლოდ ორი რეალური მომენტი შექმნეს. ჯერ მე-11 წუთზე საბანაძის დარტყმული მოიგერია ძელმა, შემდეგ კი ლობჟანიძის ცდილობდა გოლის გატანას. “შუქურა” კაკლაძემ გადაარჩინა და ბურთი კუთხურზე მოიგერია. ამ ეპიზოდებს შორის ქობულეთელებმა რამდენიმე სახიფათო მომენტი განახორციელეს, თუმცა ტაიმი უგოლოდ დასრულდა.
მეორე ნახევარში სტუმართა მცირე უპირატესობით დაიწყო, თუმცა “დინამომ” ბურთი მალევე დაიბრუნდა და რამდენიმე სახიფათო მომენტი შექმნა. 57-ე წუთზე შეტევაში ჩართულმა ხიზანიშვილმა ბურთი ლობჟანიძეს გადააწოდა, რომელმაც კარში ძლიერად დაარტყა, თუმცა კაკალაძემ კუთხურზე მოიგერია. ხიფათი სტანდარტსაც მოჰყვა, თუმცა გველესიანმა ახლო დისტანციიდან ააცილა მეტოქის კარს. ორ წუთში გატანა შეცვლაზე შემოსულ პაპუნაშვილსაც შეეძლო, რომელამც თავით სახიფათოდ დაარტყა და კარს მცირე მანძილით ააცილა.
“დინამომ” შანსები ვერ გამოიყენა და ამის გამო მალევე დაისაჯა. 71-ე წუთზე “შუქურამ” კონტრშეტევა განახორციელა. მეკარესთან პირისპირ მეტრეველი დარჩა, თუმცა მისი დარტყმული მიგინეიშვილმა კუთხურზე მოიგერია. სტანდარტს საპირისპირო ფლანგიდან კიდევ ერთი კუთხური მოჰყვა, რაც საბოლოოდ გოლით დასრულდა. მასპინძელთა საჯარიმოში შექმნილი არეულობით ყოფილმა “დინამოელმა”, ხოჭოლავამ ისარგებლა და ანგარიში გახსნა – 0:1.
გაშვებული გოლის შემდეგ, “დინამომ” ზეწოლა გააძლიერა, რამაც საბოლოოდ შედეგი მატჩის დასრულებამდე 6 წუთით ადრე გამოიღო, როცა ჯერ ჩირგაძემ ანგარიშის გათანაბერბა მოახერხა, ხოლო სულ რაღაც ორ წუთში მასპინძლები პარუნაშვილის საკმაოდ ეფექტური გოლით დაწინაურდნენ. მსაჯის მიერ კომპენსირებულ წუთებზე “დინამო” კონტრშეტევა ლობჟანიძის გოლით დასრულდა – 3:1
დინამო 3:1 შუქურა
გოლი: 0:1 ხოჭოლავა 71’ 1:1 ჩირგაძე 84’ 2:1 პარუნაშვილი 87’ 3:1 ლობჟანიძე 90’
დინამო: მიგინეიშვილი, კაკაბაძე, ხიზანიშვილი, გველესიანი, შერგელაშვილი, ცინცაძე, პარუნაშვილი, პაპავა (ჯანელიძე 76), ლობჟანიძე, ჩისკო (პაპუნაშვილი 59), საბანაძე (ჩირგაძე 46)
შუქურა: კაკალაძე, ჩალაძე, გურული, ხოჭოლავა, კალანდაძე (ბერუაშვილი 65), ტვილდიანი, კუხიანიძე, ლობე, ტუღუში (კომახიძე 75), ჩელებაძე, მეტრეველი (კოპალიანი 89)
მარიამ ნიშნიანიძის ფოტოები
