სიმეონე: “ლა ლიგას ის მოიგებს, ვინც მენტალურად უფრო ძლიერი იქნება”
მადრიდის “ატლეტიკო” გასვლაზე ბილბაოს “ატლეტიკთან” დამარცხდა (2:1), რითიც კატალონიის “ბარსელონას” სატურნირო ცხრილში პირველ ადგილზე გადასვლის შანსი მისცა. დიეგო სიმეონემ მატჩის შემდეგ ჩემპიონობისთვის ბრძოლაზე ისაუბრა.
“რამდენიმე დღის წინ მკითხეს, თუ რა იქნებოდა ყველაზე მნიშვნელოვანი ლა ლიგის სეზონის მიწურულს. დარწმუნებული ვარ, რომ ლა ლიგას ის მოიგებს, ვინც მენტალურად უფრო ძლიერი იქნება. გადამწყვეტი ემოციური მდგომარეობა იქნება.
ესპანეთის ჩემპიონატს ჩვეულებისამებრ “ბარსელონა” და “რეალი” იგებენ, 2014 წელსა და სხვა გამონაკლისებს თუ არ ჩავთვლით.
სეზონის უმეტესი ნაწილი ლიდერის პოზიციაში გავატარეთ, მაგრამ ფაქტია, რომ “რეალი” და “ბარსელონა” ტიტულისთვის ბრძოლას არასდროს ეთიშებიან. “სევილიაც” მოგვიახლოვდა.
ყველაფერი ძალიან სწრაფად იცვლება. არ ვიცით, თუ როგორ დასრულდება ეს ყველაფერი. ჩვენ მხოლოდ იმაზ ვაპირებთ ფიქრს, რისი შეცვლაც შეგვიძლია,” – აცხადებს არგენტინელი სპეციალისტი.
