“სიონმა” “ზესაფონი” დაამარცხა
2013 წლის 25 სექტემბერს გაიმართა დავით ყიფიანის სახელობის საქართველოს ეროვნული თასის გათამაშების მერვედფინალური სტადიის პირველი მატჩები. მიხეილ მესხის სახელობის სტადიონზე ერთმანეთს ბოლნისის საფეხბურთო კლუბი ”სიონი” და საფეხბურთო კლუბი ”ზესტაფონი” დაუპირისპირდნენ.
შეხვედრის საწყისი წუთები თანაბარ ბრძოლაში კი წარიმართა, თუმცა პირველი სახიფათო მომენტი 13-ე წუთზე მაინც სტუმრებმა შექმნეს – თორნიკე გრიგალაშვილის დარტყმა ბოლნისელთა კარის ძელმა მოიგერია. მასპინძლებმა გიორგი კახელიშვილის სახიფათო გარღვევით უპასუხეს, თუმცა იმერელთა მცველებმა მას გადამწყვეტი დარტყმის განხორციელების საშუალება არ მისცეს.
ამის შემდეგ ტერიტორიულ და სათამაშო უპირატესობას ზესტაფონელები დაეუფლნენ და “სიონის” გოლკიპერ ზურაბ ბათიაშვილის კართან რამდენიმე სახიფათო შეტევა განახორციელეს. გიორგი ადამიას და ორჯერ ირაკლი ქობალიას თავის გუნდის დაწინაურების კარგი შანსები მიეცათ, თუმცა ყველა ამ ეპიზოდში საიმედოდ ითამაშა ქვემოქართლელთა გოლკიპერმა.
მეორე ტაიმი ნაკლებად სანახაობრივი გამოდგა. სახიფათო მომენტები ნაკლებად იქმნებოდა, თუმცა სანდრო გურულს მაინც მიეცა საკუთარი გუნდის დაწინაურების მშვენიერი შანსი – ის ბოლნისელთა მეკარესთან პირისპირ აღმოჩნდა, მაგრამ ზურაბ ბათიაშვილმა მოახერხა “სიონის” აშაკარა გოლისაგან ხსნა. სამაგიეროდ, ბოლნისელებმა თავის პირველივე შანსი გოლად აქციეს – სტუმართა საჯარიმოში აკაკი მიკუჩაძის წაქცევისათვის (ამ ეპიზოდის გამო მატჩის არბიტრმა მოედნიდან ილია კანდელაკი გააძევა) დანიშნული 11-მეტრიანი საჯარიმო დარტყმა გოლად თავად დაზარებულმა აქცია. პირველი მერვედფინალური მატჩი ბოლნისელთა გამარჯვებით, ანგარიშით 1-0 დასრულდა.
FCZestafoni.GE
