სტივენ ჯერარდს მოკვლით დაემუქრნენ
„ლივერპულის“ მელვუდის საწვრთნელ ბაზაზე გუშინ არასასიამოვნო ფაქტი მოხდა. უცნობმა პირმა მერსისაიდული გუნდის კაპიტან სტივენ ჯერარდს პირადი შეურაცხყოფა მიაყენა.
იმ დროს, როდესაც ჯერარდი თანაგუნდელ ფილიპე კოუტინიოსთან ერთად საჯარიმო დარტყმებზე ვარჯიშობდა, უცნობმა პირმა მელვუდის კედლიდან ინგლისელი ნახევარმცველის მისამართით შეურაცხმყოფელი ფრაზების ყვირილი დაიწყო.
თავდაპირველად ჯერარდმა უცნობ პიროვნებას ყურადღება არ მიაქცია, თუმცა ინგლისელ ფეხბურთელს მოთმინების ფიალა მაშინ აევსო, როდესაც საქმე პირად შეურაცხყოფამდე მივიდა.
„ვიცი, სადაც ცხოვრობ. მე შენს დამპალ სახლს გადავწვამ“, – გაჰყვიროდა უცნობი.
„ლივერპულის“ დამხმარე მწვრთნელმა კოლინ პასკომ ძლივს დააკავა ჯერარდი, რომელიც უცხო პიროვნებასთან საქმის გასარკვევად აპირებდა მისვლას.
ლი რედკლიფმა, რომელსაც „ლივერპულის“ ფეხბურთელთა მაისურებით მომარაგება ავალია, სასწრაფოდ გავარდა მოედნიდან, რათა უცნობი პიროვნება დაეჭირა, თუმცა ეს ვერ მოახერხა. უცხო პიროვნება ველოსიპედს მოაჯდა და სასწრაფოდ გაეცალა იქაურობას, თან გაჰყვიროდა:
„შენც მოგკლავ და შენს დამპალ შვილებსაც“.
ბექა დოგრაშვილი
